Hulanda: Ley di distribucion di asilo ta gana mayoria di Parlamentario; Pero sosten di Senado ta keda incierto

(NLTimes) – Un mayoria di Tweede Kamer a aproba e ley di distribucion di asilo cu tin meta pa sigura un distribucion husto di solicitante di asilo entre e municipalidadnan. Sinembargo, ta keda altamente incierto si e ley, proponi pa Secretario di Estado pa Asilo y Migracion, Eric van der Burg, lo haya un mayoria den Eerste Kamer.

E mayoria den Tweede Kamer ya tabata spera despues di un debate di dos dia siman pasa riba e legislacion politicamente sensitivo aki. Ainda mester mira si e ley ta bay haya mayoria den Senado.

Actualmente, 37 senador ta contra e ley cu 36 na fabor. E posicion di 50Plus y OPNL ta bay ta decisivo. Ambos partido ainda no a determina nan posicion, manera nan a revela na agencia noticiero ANP contestando pregunta.

Tambe ta incierto si Senado ta bay revisa e ley prome cu proximo eleccion di Tweede Kamer dia 22 di november. De lo contrario, e acomodacion di solicitantenan di asilo probablemente ta bay bira un punto clave di negociacion durante e formacion di un gobierno nobo.

Si ta discuti y mayoria den Eerste Kamer ta aproba e ley, ta bay dura un aña mas pa e drenta na vigor. Den simannan recien, e centro di registracion na Ter Apel, Groningen, ta excepcionalmente druk. Solicitantenan di asilo nobo ta siendo acomoda na henter e pais pero no sin dificultad.

Van der Burg recientemente a haci dos apelacion urgente na municipalidadnan pa regla shelter rapidamente pa solicitantenan di asilo. El a declara diabierna cu ta rekeri 8,400 lugar adicional pa acomodacion e aña aki.

Oponentenan di e ley, PVV y JA21 a purba di kita e elemento obligatorio for di e ley mediante mocionnan. E ley ta stipula cu si e municipalidadnan nenga di acomoda solicitantenan di asilo, ta bay obliga nan pa hacie. E mocion a keda rechasa. Otro mocion pa stop asilo tampoco a pasa.

Sinembargo, algun mocion cu meta pa reforsa levemente e politica di asilo si a haya sosten. Por ehemplo, un mocion di CDA y VVD pa reduci provision pa solicitantenan di asilo di prospecto abao a haya sosten. Tweede Kamer tambe a sostene un mocion di VVD y CDA pa permiti examinacion di celular di solicitantenan di asilo pa verifica nan storianan di asilo. Tweede Kamer kier pa e gabinete stop di usa solamente entrevistanan por escrito, insistiendo riba entrevista presencial.

Un mayoria di parlamentario tambe a aproba un mocion sosteniendo e idea cu municipalidadnan no mester tin e prerogativa mas pa seleccion ki tipo di solicitante di asilo nan ta acomoda. Algun municipalidad ta preferi famia na lugar di homber soltero, por ehemplo. Un mocion di D66 y GroenLinks-PvdA sosteniendo e idea aki a haya suficiente sosten.