Minister di defensa Hulandes Ank Bijleveld a laga conoce durante su bishita di trabou cu lo yuda Aruba combati cu criminalidad y ilegalidad.
Hunto cu su delegacion, minister Bijleveld a bishita prome minister, Evelyn Wever-Croes y minister di Husticia, Andin Bikker, segun e comunicado di gobierno.
E bishita mas bien tawata pa trata e punto di siguridad na Aruba: aumenta e siguridad na Aruba, combati criminalidad y ilegalidad ta un prioridad di gobierno di Aruba, e comunicado ta sigui bisa. A yega na convenionan importante cu Hulanda pa hunto combati criminalidad na un forma mas severo, segun gobierno di Aruba.
Prome minister Wever-Croes ta splica cu ‘un di e temanan cu a yega na un compromiso riba dje ta trata di Arumil’. “Arubanonan cu ta bay opleiding di marinier na Marinierskazerne, despues di cinco aña ta sali di eynan y lo mester bay busca trabou otro caminda”, e premier ta splica. “A yega na un convenio cu e personanan aki, unabes cu nan tin cinco aña di servicio na Marinierskazerne nan por drenta den un departamento di gobierno cu ta traha riba e tereno di siguridad, entre otro polis, duana, den cuerponan uniforma cu ta combati ilegalidad y criminalidad.”
E mandatario principal di nos pais ta considera esaki un punto hopi importante y un logro grandi pa motibo cu esaki ta duna nos hobennan mas perspectiva y mas oportunidad. El a expresa cu ‘lo ta di hopi lamenta cu un hoben ta pasa den cinco aña den training y di experiencia den Marinierskazerne y despues e no ta bay traha un caminda unda e por aplica su conocemento y experiencia’.
Un punto di discusion hopi importante, prome minister ta enfatisa ‘cu di parti di Hulanda a sali e compromiso di Hulanda pa yuda Aruba den caso si Aruba en contra un crisis cu e refugiadonan di Venezuela’.
Ainda e detayenan no ta conoci, pero lo wordo discuti den e proximo dianan. Pero ‘naturalmente’ cu si algo mester pasa na Aruba, e cara di Reino lo keda malo si acaso nos no atende cu esaki na un bon manera. Hulanda tambe ta realisa esaki y a duna su palabra cu lo yuda.
Prome minister ta bisa ‘cu ta spera cu esaki lo no bira e caso y Aruba en contra su mes den e crisis di refugiado, pero mester ta prepara. Aunke ta keda cu fe y confiansa cu e problemanan di Venezuela wordo soluciona eynan mes y nos no tin mester di haya un fluho grandi di refugiadonan’.
“E reunion a bay hopi bon y den bon ambiente, unda hopi palabracionnan a wordo concretisa riba tereno di husticia y combatimento di criminalidad pa poco poco Aruba por wordo haci mas sigur”, prome minister a finalisa.
