(NL Times)— Hulanda ta tumando medidanan grandi pa transforma e pais na un cu “ningun mascota tin cu sufri di nan aparencia,” Minister Piet Adema di Cultura, Naturalesa y Calidad di Cuminda a anuncia diabierna.
E meta ta pa introduci dos tipo di prohibicion: un prohibicion di ta doño di animal cu caracteristicanan exterior cu por causa e animal daño, por ehemplo, pushi cu horea dobla of cacho cu nanishi cortico. E otro prohibicion ta pa preveni di mustra e tipo di animalnan aki den aviso.
Aunke caracteristicanan manera horea dobla of nanishi cortico/flat ta mustra lief, esakinan por causa sufrimento pa e animalnan. Cacho cu nanishi cortico/flat, por ehemplo, casi semper tin problema cu rosea. Hulanda kier cuminsa di combati e sufrimento di animal, cuminsa cu pushi y cacho, Adema a bisa.
E prohibicion di tin mascota cu caracteristicanan dañino lo inclui automaticamente un prohibicion pa importa e animalnan aki. Adema ta considerando con pa implementa esaki. E ta pensando di traha un lista cual lo señala caracteristicanan cu por causa sufrimento permanente. E lista lo cuminsa chikito pero por wordo expande si mas estudio revela mas aspectonan dañino.
Lo bin un reglo transicional pa personanan cu tin tipo di animalnan aki caba. Nan lo por keda cu nan mascota te ora esaki fayece.
“Wak un cierto tipo di mascota frecuentemente ta causa cu ta bin mas demanda p’e,” E Minister a bisa. Pa preveni esaki, Adema ta trahando tambe riba un prohibicion di mustra e mascotanan aki riba aviso of riba red social. Tambe e lo “considera e rol cu celebridadnan tin”.
Adema ta subraya cu e dos prohibicion aki ta complica. E Ministerio tin hopi pregunta pa contesta, por ehemplo con por determina obhetivamente cu un animal ta sufriendo di su aparencia y con pa maneha e libertad di expresion riba red social: “Pa resolve e asuntonan aki ta tuma tempo, pero nos kier informa pueblo caba cu esaki ta den desaroyo, specialmente na esunnan cu kier trece mascota den nan cas”.
