(NLTimes)—Investigadonan Hulandes a desaroya un simpel test di orina pa test funcion di riñon na cas y asina mehora deteccion trempan pa malesa di riñon. Sintomanan di insuficiencia renal mayoria biaha ta aparece solamente ora ta demasiado laat pa por haci algo. “Esaki ta un stap importante den direccion di screening di poblacion pa daño di riñon,” segun e lider di e estudio, Ron Gansevoort, ken ta un profesor di malesa di riñon na Universidad Centro Medico na Groningen (UMCG).
Daño di riñon cu no wordo trata por resulta den insuficiencia renal y malesa cardiovascular. Y mayoria hende ta desaroya sintomanan solamente ora e funcion di riñon cay bao 25%, cual ya ta demasiado laat. Aproximadamente 1.7 miyon hende na Hulanda tin daño cronico na nan riñon. Aproximadamente 18.000 hende lo mester di dialisis renal of un transplante. Hopi ta muri for di malesa cardiovascular, segun UMCG.
Estudionan den pasada na Groningen y Noord-Brabant a mustra cu demasiado proteina den orina ta señala daño renal. A base di esaki, e investigadonan for di UMCG y e Hospital Amphi na Breda a desaroya un simpel test den cual participantenan ta colecta orina den un tubo na cas y ta manda esaki na un laboratorio pa test e nivel di proteina. E estudio a ser conduci na Breda, unda e investigadonan a puntra 15.000 residente entre 45 y 80 aña di edad pa haci un test di orina na cas. Rond di 60% di individualnan contacta pa participa den e estudio.
Investigadonan a descubri proteina excesivo den 3.3% di e muestranan. E participantenan aki a haya yamada pa un investigacion “follow-up”. “Den un cantidad significante di e participantenan aki, a detecta abnormalidadnan cu ainda no a ser detecta, manera presion halto, colesterol eleva, diabetes y un reduccion di funcion renal. Hopi di e malesanan aki ta tratabel,” segun e investigadonan.
Segun e investigadonan, e estudio ta mustra cu e test ta efectivo ambos den resultadonan y costo y cu residentenan di Hulanda ta dispuesto pa haci esaki. E investigadonan ta bay expande nan estudio cu e meta pa mira di esaki por bira den un screening di e poblacion nacional.
