Hulanda: “Insuficiente evidencia” pa conecta vacuna contra Covid-19 cu Covid Largo

(NLTimes)—Lareb no por a haya suficiente evidencia pa conecta vacunanan contra Covid-19 cu casonan di Covid Largo, segun e centro di efectonan a bisa diaranson. E centro a subraya cu mester mas investigacion riba esaki.

E centro a ricibi mas cu 2,200 reportahe for di hende cu sintoma cu a cuminsa dentro di 28 dia despues di haya vacuna y cu a dura pa mas cu seis luna. Lareb a sigui investiga 78 di e 2,282 reportahe, cual a envolvi “un combinacion di kehonan tipico” cu ta mustra similar na Covid Largo.

“E combinacion di kehonan ta hopi diverso,” manera Covid Largo, Lareb a bisa. Esakinan ta inclui rosea cortico, cansancio, malestar, dolor di pecho, palpitacion, draaimento di cabes, dolor di cabes, dolor di curpa y kehonan di joints. “Tambe menciona ta niebla cerebral, dificultad cu pensamento, un reduccion den habilidad pa concentra, dificultad pa haya palabra, incapacidad pa deal cu stimuli y perdida di memoria.”

Mas cu mita di e 78 casonan investiga a ser examina medicamente. 16 a haya diagnosis medico, 11 di cual tabata Covid Largo. “Den casi mita di e reportahenan aki, ningun investigacion medico a ser haci den e posibel casonan di kehonan, of esaki no ta conoci,” Lareb a bisa. “No ta claro di tin otro posibel causa, manera un infeccion di coronavirus.” No tur hende a haci test pa coronavirus.

P’esey Lareb a conclui cu e tabatin “insuficiente evidencia” pa bisa cu tin un conexion entre e sintomanan aki y cu e vacunanan contra Covid-19. E directiva di evaluacion di medicina a yega na e mesun conclusion.

Pero director di Lareb, Agnes Kant, a subraya na NRC cu mester mas investigacion riba esaki. E timing di e sintomanan, entre otro, ta sorprendente, el a bisa. “Nos ta mira un patronchi den cual un proporcion grandi di e kehonan a surgi den e prome tres dianan despues di vacuna.”

Dokter Eline Hofman a enfatisa na De Volkskrant cu Lareb a investiga solamente 3% di mas cu 2,200 reportahe cu el a ricibi te cu 16 di augustus 2023. “Esey ta causa cu mester puntra: kico e otro 97% tin?” E tambe ta pensa cu mester mas investigacion riba e asunto aki, yamando e rapport di Lareb “un piesa di e puzzel.”