Parlamento mester ta consciente cu tin limite na su libertad riba presupuesto di Aruba. Esaki ta e informacion cu e team negociado di Aruba a duna e siman aki na e organo legislativo di Aruba. E informacionnan aki a bin hunto cu e reunionnan riba Eagle LNG.

Prome Minister Evelyn Wever Croes na e encuentro informativo a splica Parlamento cu casi mester a cuminza di nobo pa negocia e COHO, despues cu Raad van State a sostene pensamento di Corsou, St. Maarten y Aruba cu e autoridad cu e proposicion original di ley tabata mishi cu e funcion di Parlamentonan. Tambe a negocia e Rijkswet Supervision Financiero, e Raft. “Nos a negoci’e mas cu tabata por,” Prome Minister Evelyn Wever Croes a informa, agregando cu mester a percura cu CAft y COHO por funciona sin cu nan autoridad ta cruza otro, na momento cu mester dirigi ehecucion di e landspakket.

Mr. Carlos Guaimo, hurista den e team negociador na nivel di ambtenaar, a splica cu Hulanda a cambia di pensamento rigido di COHO despues di e conseho di Raad van State. “Locual a sigui ta un negociacion na nivel di ambtenaar. A bin diferente cambio, unda Parlamento a haya mas autoridad. Di otro banda, e ta keda un consenso forsa. Y tabata e condicion pa sosten di likides.”

CAft lo controla si ta cumpli cu landspakket

Mester a negocia si e intencion di Hulanda ta practico, pasobra locual tabata busca ta un supervision financiero mas skerpi cu lo mester a pone cu Aruba tin cu pidi aprobacion pa cada gasto. “A logra saca esaki afo. Pero a cambio a bin otro areglo. Awor tin un acuerdo riba e nota di cambio. Esta cu e cu Presupuesto di Aruba mester ta e refleho di ehecucion di e landspakket. Esey ta e manera con kier controla cu Aruba ta ehecuta e landspakket y un di e maneranan ta cu ta bin un supervision multianual, dirigi specificamente riba e landspakket. Y aki ta unda CAft ta haya un rol pa mira si e refleho ta cuadra,” Guaimo a bisa.

Mas ainda, CAft ta haya e responsabilidad pa evalua si den presupuesto di Aruba tin fondonan pa proyectonan cu por obstaculisa e ehecucion di e landspakket. Na e momento ey, CAft por bisa cu tin algo cu ta stroba. “A negocia pa sa kico ta e consecuencia si CAft yega na e conclusion ey. CAft lo bin cu un reportahe di ehecucion, cu tabata hinca den e concepto di ley. E mesun reportahe di ehecucion ta yuda Minister pa Asuntonan Interior y di Reino dicidi sea ta sigui financia Aruba pa medio di sosten di likides of fondonan cu ta bay directamente pa COHO den su papel pa sostene Aruba den ehecucion di e landspakket. Esey ta e mecanismo di control, cu a bin acerca den un nota di cambio.”

Guaimo a bisa cu e negociacionnan na nivel di ambtenaar a culmina y cu awor e combersacionnan ta na nivel di Gobiernonan, si ta duna e aprobacion final, pa despues nan yega na tur Parlamento di Reino. “Esey lo conduci na e creacion di e Consensus rijkswet.” E hurista specialisa den legislacion a bisa cu Parlamentarionan tin un papel importante pa hunga, entre otro pa manda pregunta, entrega amienda, comunica cu e coleganan Hulandes. “Pero e realidad ta si cu e Parlamentarionan di Aruba lo no por vota.”

Director di Finanzas, Derrick Werleman a bisa cu e cambio ta importante pasobra awor lo no controla cada paso di Gobierno, pero tampoco ta afecta COHO den su funcion di controla e ehecucion di e landspakket. “E principio general a haya un rol defini, pa evita cu ta bruha e rolnan di COHO. COHO riba su mes no tin acceso riba presupuesto total, y no por wak kico ta stroba ehecucion di e landspakket. Pero CAft e ora ta controla henter e presupuesto y kico por ta estorbo pa e landspakket,” el a reitera.

E tema di refinanciamento

Sinembargo, e aspecto cu Werleman a resalta ta e realidad financiero di Aruba. E prestamo cu Hulanda di riba 900 miyon ta bay caduca na April 2022. “Aruba a manda proposicion con pa atende cu e refinanciamento y a discuti caba cu Hulanda. Hulanda a bisa pa pone kico kier riba un papel. Den liña grandi, e proposicion ta ilustra cu tin un prestamo di cero (0) porciento. Y si no ta papia di dispensacion di debe, lo ta desea condicion similar. Ademas uno cu por paga riba un termino mas largo y pa nan no ta e prome debenan cu mester paga. Si mester refinancia a base di condicionnan di mercado e lo ta mucho mas caro, pues a propone pa hala e momento cu e debenan ta madura, segun mediano plazo.” Werleman a bisa cu ora cu tin añanan cu surplus presupuestario, cu un situacion ta mas stabiel lo por paga prome e debenan comercial di Gobierno di Aruba, cu ta mas caro. “No tin sentido pa paga e debe mas barata, sino esun mas caro.”

Hulanda no a contesta ainda riba e propuesta y ta wardando esun di Corsou, en particular. Kier coordina pa tur e acuerdonan cu e tres islanan ta similar. Pues falta contesta formal.

Ainda no a dicidi riba tema di dispensacion di debe, esta e kwijtschelding, particularmente pasobra na nivel di ambtenaar no por a ni trece e tema na e gabinete Demisionario di Hulanda. “Awor cu Hulanda a yega na acuerdo di gobernacion, lo por atende cu e tema aki. Si tin kwijtschelding, e lo ta probablemente bao condicion,” Werleman a ilustra. Riba pregunta di Miguel Mansur di Accion21, e Director di Finanzas a bisa cu Aruba mes a propone cua ta e condicionnan, esta cu Aruba ta cumpli cu e landpakket y e obhetivonan. Esey lo por yuda pa Hulanda dicidi pa duna sea un dispensacion di debe of cu e interes ta keda hopi abao.

Protocol 2018

Mientrastanto, e protocol cu Aruba a cera cu Hulanda riba normanan financiero y presupuestario a caduca. E fecha tabata di 2019 pa 2021. Hulanda a pidi pa otro areglo, pero uno sin cu tin un fecha di terminacion. Aruba a argumenta cu ta bay tin e Rijkswet Aruba financieel toezicht, Raft, cu ta regula e normanan. “Aruba ta pensa cu e extension di e protocol por ta pa un periodo cortico. Hulanda tin otro punto di bista. Pues ainda ta den un tema di debate,” Derrick Werleman a splica.

Prome Minister Evelyn Wever Croes a agrega cu expertonan a conseha pa Gobierno acepta e nota di cambio y locual a logra te awor. “E otro decision ta e protocol nobo. Nos a negocia normanan nobo cu mester bay den e RAft, pero Hulanda ta kere cu e ley ta bay tarda pa drenta na vigor. Nan kier un protocol di transicion sin fecha di fin y mi tin problema cu esaki, pasobra no tin fin na e protocol y Parlamento lo no tin algo di bisa. Den caso di LAft, Parlamento tabatin su papel y den e RAft tambe.” El a pidi Parlamento tempo pa sigui pone presion pa mira con pa yega na resolucion.

12 miyon

CAft tambe kier pa hala atras e reduccion di loonbelasting y ya cu nan no ta de acuerdo cu a duna e rebaho a kita e suma di e sosten di likides cu Aruba mester, mr. Wever Croes a sigui splica. “Aruba tin un necesidad di 50 miyon florin pa e prome kwartaal di 2022 pa paga gasto. CAft a bin cu su pen cora y a conclui cu mester di 12 miyon. Sinembargo Hulanda a mara tur cos na otro y a bisa cu si no bay de acuerdo cu e protocol manera cu tin riba mesa (sin ‘einddatum’) Aruba no ta bin na remarca pa sosten di likides. Si no bay de acuerdo cu COHO y nota di cambio, tampoco. Pero locual mi ta lamenta, cu tema di protocol ta bin como ultimo y bruha tur cos. Y ni cuanto cu a cumpli cu landspakket, si no cumpli cu esey no ta haya sosten.” Di otro banda, e tin confianza cu aunke con dificil, Gobierno lo sali afo di e asunto aki hunto cu Hulanda.

Bon Dia Aruba lo amplia riba e presentacion aki cu ta ilustra e retonan grandi di pais Aruba, incluso e condicion pa baha gasto di personal na 10 porciento di e Producto Bruto Interno. Awor e ta casi 12 porciento.

Potret di archivo.