Hulanda: Hende ta comiendo menos fruta y berdura

(NLTimes)—Hende Hulandes a cuminsa come menos fruta y berdura aña pasa. Companianan di agricultura y distribicion ta papia di un caida preocupante den consumo. Sinembargo, e sector a logra comercia mas fruta y berdura en general debi na un aumento den importacion y benta den exterior.

Consumo di producto Hulandes a cay pa tres porciento na 2024 manera e asociacion di producto Hulandes, GroentenFruit Huis, a reporta. Hende Hulandes a come un promedio di dos porciento menos berdura y cuatro porciento menos fruta compara cu e aña anterior.

“Como resultado di esaki, consumo Hulandes ta keda hopi atras di e cantidad diario recomenda pa e Voedingscentrum,” GroentenFruit Huis ta adverti. E recomendacion ta pa come 250 gram di berdura of 200 gram di fruta tur dia. En general, un persona Hulandes ta comiendo awor solamente 60 porciento di e standard aki.

E motibo pa e caida aki no a ser stipula den e cifranan anual. Sinembargo, GroentenFruit Huis ta nota cu e caida a sucede den ambos supermercadonan y servicio di catering. E industria ta reconoce cu fruta y berdura a bira mas caro compara cu aña pasa, aunke e aumento den prijs ta comparable cu prijsnan di otro producto y servicio.

E produccion di fruta y berdura na Hulanda ta representa un balor di 4.7 biyon euro na 2024. Productonan importa a aumenta cu cuatro porciento pa 11 biyon euro. Desde 2023 tabatin un aumento di tres porciento den exportacion. Esaki ta conta pa 15.6 biyon euro den total.

E rol di Hulanda como un pais di transito importante pa producto ta kico a proteha e industria contra un dañonan. Importacion for di China en particular a aumenta significantemente aña pasa debi na un suministro mas grandi di conoflok y ginger. Un cantidad grandi di awacati a bin for di Kenia. Un cantidad halto di blueberry, druif y kiwi a bin for di Chile.

Blueberry, druif y concomber exporta a ser mayormente manda pa Alemania, Belgica y Reino uni. Awacati y tomati exporta manda pa Austria, Belgica y Spaña a aumenta significantemente, segun GroentenFruit Huis. E aumento den e cifranan aki a contribui na e crecemento di e industria a pesar di menos consumo for di hende Hulandes.