Polis Hulandes ta buscando un criminal Escoces en conexion cu asesinato di reportero di crimen y ex criminal, Martin Kok na december 2016.
E homber cu polis ta busca pa interogacion ta Christopher Hughes, di 30 aña di edad for di Glasgow, kende nan ta sospecha por a conduci Kok na su morto pafo di un club di sex na Laren. A tira Kok mata pafo di club Boccaccio apenas algun ora despues cu el a sobrevivi un intento anterior riba su bida na Amsterdam.
E homber mas busca di Hulanda, Ridouan Taghi, tambe ta busca en conexion cu e asesinato.
Segun e show di television Oppsoring Verzocht, e Escoces y cuatro otro miembro di e mesun gang regularmente ta na Amsterdam, y un di e grupo por biba den e ciudad. “Tin un chens berdadero cu e cinco persona aki ta regularmente na Hulanda, particularmente Amsterdam, Rotterdam y Eindhoven”, polis a bisa den un declaracion. “Algun di nan por biba na Amsterdam of keda aki pa un periodo mas largo.”
E gang ta lidera pa e rumannan James y Barry Gillespie di Glasgow, kende a crece converti den ‘bringado di caya’. Corant Escoces, the Daily Record a describi e rumannan na februari como ‘rey di cocaina’ y a bisa cu probablemente nan ta na Brazil. E corant a bisa cu e buskeda di e par ta coordina pa sede di Europol na Den Haag.
Polis di droga ta bisa cu Hughes tabata cu Kok e anochi cu el a ser asesina. Tambe e ta sospechoso di ta involucra den trafico di droga.
Kok, di 49 aña, tabata maneha un agencia di ‘escort’ como tambe un website di noticia, Vlinderscrime, cual tabata contene reporte basa riba informacion si su red extenso di fuente den mundo baho. El a provoca rabia di miembronan di comunidad criminal door di inclui nan nomber completo y informacion di nan famia riba su pagina.
Prome cu a cuminsa su pagina, Kok a pasa un total di 15 aña den prizon pa ofensanan incluyendo asesinato y chantahe. E tabata obhetivo di varios intento di asesinato, incluyendo un bom bou su auto na juli 2016.
Polis ta ofreciendo un recompensa di 5mil euro pa informacion di e ubicacion di tur cinco homber.
