Gobierno Hulandes a pone un banda 8.5 biyon euro pa yuda studiantenan di scol basico, avansa y universidad alcansa loke nan a perde unabes scol y universidad habri back manera normal.
Ademas, studiantenan di universidad y scol avansa lo paga solamente mita di e schoolgeld cu nan mester a paga e aña entrante, segun ministernan di educacion, Ingrid van Engelshoven y Arie Slob a anuncia ayera tardi.
“Hasta si tur institucion educativo ta habri di nobo, mester haci hopi pa trece educacion back on track”, Van Engelshoven a bisa.
E pakete presenta ayera ta ‘sin precedente’, Slob a bisa reporteronan. El a bisa cu ta haci husticia na tur alumno cu a wordo impacta sistematicamente pa e pandemia.
Lo reparti e presupuesto di 8.5 biyon euro riba 2.5 aña y lo cubri tur tipo di educacion, for di basico te na necesidadnan special. Scolnan lo ta liber pa dicidi con pa gasta e placa aloca na nan.
Entre e opcionnan cu por considera: les adicional durante break di zomer, assistent di klas adicional pa scol primario y klas di habilidadnan mixto den prome añanan di scol secundario, pa sigura alumnonan alcansa e nivel adecua, e ministernan a bisa.
Scolnan primario lo ricibi 180mil euro adicional den proximo aña escolar y scolnan secundario lo ricibi 1.34 miyon euro adicional, pero scolnan cu un cantidad grandi di mucha menos privilegia lo ricibi mas.
Ademas, gobierno a aloca otro 644 miyon euro pa yuda universidad cu a ser afecta pa un aumento den cantidad di studiante. Cantidad di studiante a aumenta cu alrededor di 10 porciento e aña academico aki.
