(NLTimes)—Si hospitalnan tin problema pa cuida pashent infecta cu coronavirus den e simannan binidero, ta pasobra cu no tin suficiente personal. E deficit lo determina si nan por maneha e entrada di pashent en bes di e cantidad di pashent cu tin caba, segun e hospital den un encuesta di ANP.
Hasta prome cu e pandemia, e sistema di cuido di salud a sufri di un deficit den personal, y esey a bira pio durante e añanan di Covid-19. Mas infeccion y admision di pashent subi, mas trahadonan di salud lo bira malo y stop di traha. E ora ey lo tin menos hende pa yuda cuida mas pashent.
Actualmente, hospitalnan na Hulanda ta cuidando casi 600 persona cu a contrata e coronavirus. Dentro di un luna, e presion a bira dobel. Den e simannan binidero, e utilisacion por probablemente subi pa 800 pashent. Den escenario pio di e Centro di Coordinacion pa Plamamento di Pashent Nacional (LCPS), e cantidad di pashent cu corona cu wordo admiti no lo ta mas cu 1.000. Esey lo bira e aumento mas grandi desde april aña pasa. E presion ta keda subi, specialmente den stacionnan di nurse.
Pero e Centro Medico di Universidad di Groningen (UMCG) a declara cu nan por adapta pa e ola nobo lihe si mester, pero “nos no lo tin suficiente personal pa por admiti pashentnan cu Covid y haci tratamento regular. Esey kiermen cu cuido regular lo mester wordo posponi si e presion di corona subi atrobe. “Pa ki medida claro lo depende riba e cantidad di pashent extra,” segun Ger Sieder, ken ta presidente di e team di limitacion di e hospital.
E hospital Radboudumc na Nijmegen a declara cu nan wak e ola nobo biniendo caba, y nan a desplega extra personal. “Nos a ripara e siman aki cu absentismo entre personal ta subiendo. Esaki ta causa cu temporalmente nos mester cera cama den algun departamento y cancela algun operacion, aunke nos ta mas flexibel den algun otro departamento. Si e entrada di pashent sigui subi y e absentismo dura mas largo, esaki lo causa mas aplasamento di cuido cu ta of no ta urgente.”
Hospitalnan Rijnstate na Arnhem, Beatrix na Gorinchem y Groene Hart na Gouda a bisa cu e deficit den personal a causa problema pa un tempo caba, sinembargo di e cantidad di pashent cu corona. “Ora tin un entrada grandi, nos mester maneha esaki. Pa logra cu esaki nos ta puntra personal pa traha orarionan extra, nos ta uza reservanan di nurse pa yuda y nos ta emplea personanan independiente,” segun Hospital Beatrix.
Otro hospitalnan tin e expectativa cu nan lo maneha e temporada binidero sin hopi problema. Esaki ta conta pa hospitalnan grandi manera Amsterdam UMC, Elisabeth-Tweesteden (Tilburg) y HagaZiekenhuis (Den Haag), pero tambe pa hospitalnan chikito manera BovenIJ (Amsterdam), Van Weel-Bethesda (Dirksland), Streekziekenhuis Koningin Beatrix (Winterswijk), St. Jans Gasthuis (Weert), Wilhelmina Ziekenhuis (Assen) y Slingeland (Doetinchem).
Ora a puntra pa splica e entrada nobo, hospitalnan a menciona carnaval y deporte di winter, y e yegada di versionnan nobo di e virus. Temporada di aña tambe ta hunga un rol, segun mediconan. Malesanan contagioso ta circula mas facil durante winter. Tambe nan a considera cu e proteccion di vacuna a reduci un tiki. Gruponan cu riesgo a ricibi vacuna na september, casi 5 luna pasa.
