(CuracaoChronicle) – Gabinete Hulandes ta haciendo un suplica urgente na e islanan. “E vacunanan ta yegando nan fecha di caduca. Please, usa e vacunanan cu ainda tin den freezer!”
Secretario di estado demisionario pa Relacionnan di Reino, Raymond Knops ta haya ‘preocupante’ cu ainda tin hopi hende na St. Maarten y St. Eustatius cu no kier tuma e vacuna. Mas cu mita di residente di St. Eustatius no ta presenta.
Gran preocupacion den Parlamento Hulandes
Tweede Kamer ta ‘preocupa’ pa e idea cu e vacunanan pronto ‘lo termina den bar’i sushi’. “No por ta e caso cu e vacunanan pronto lo caduca y mester tira nan afo, mientras hende aki na Hulanda y na otro partinan di mundo ta ansioso pa vacuna”, segun Joba van den Berg (CDA).
Manera D66, CDA y PvdA, VVD tambe ta kere cu e gabinete mester, pa e motibo aki, haci un suplica urgente. “Tambe ta importante pa economia. Temporada di turista ta na caminda y no por cera e islanan atrobe”, segun parlamentario di VVD, Aukje de Vries.
‘Manda e resto di vacuna na Suriname’
D66 kier pa manda e cargamentonan di vacuna na Suriname si ta necesario. “Eynan tin codigo preto. E cuido eynan ta den collapse y cada dia ta conta”, segun parlamentario Jorien Wuite. “Den otro palabra: si tin vacuna a resta na islanan di Caribe y un ora y mey leu tin un escasez doloroso na Suriname. Transporte mester ta posibel, hasta si ta 10mil vacuna.”
En todo caso, e gabinete kier preveni cu mester tira e vacunanan afo na e islanan. “Maske nan ta exclusivamente disponibel na hende eynan, nan no lo keda eynan indefinidamente”, segun Knops a bisa Tweede Kamer.
Riba e islanan, persona di tur edad ta permiti pa tuma un vacuna.
Pa motibo di e escala chikito, gabinete Hulandes a dicidi pa ‘inmediatamente’ vacuna tur persona sin importa edad riba e islanan lo mas pronto posibel. “Tin biaha e escala chikito ta un bentaha”, Knops a bisa. “Nos a bisa: asina cu tin vacunacion, nos lo yuda e islanan lo mas pronto posibel. No como ultimo, sino prome. Mi a pensa esey tabata simbolico, pero tambe hopi bunita.”
E meta tabata pa vacuna tur persona prome cu dia 1 di juni, pa motibo cu temporada di horcan ta cuminsa e dia ey. Secretario di Estado saliente, Knops (CDA) ta kere cu ‘no ta solidario’ cu gruponan grandi di persona no ta usa e vacunanan di Hulanda.
“Tambe bo ta pone salubridad publico den peliger si asina tiki hende ta vacuna.”
Den contraste cu Hulanda, hasta hende hoben por tuma vacuna. “Mientras cu na Hulanda hende menor di 55 aña ainda no ta ricibi un vacuna, riba e islanan tur cos tabata cla pa vacuna. Na mes momento, hende tabata wardando pa e vacuna ey, hende a hasta muri cu ainda no a ricibi e vacuna.”
Frontera no por keda cera
E islanan awo poco poco ta habriendo pa mundo exterior. Pa logra inmunidad di grupo, pa asina e virus no por plama mas, al menos dos tercer parti di e poblacion mester wordo vacuna, segun cientificonan. Si relaha medidanan mas ainda, tin riesgo cu e cantidad di hende cu ta rechasa e vacuna lo bira seriamente malo.
E gabinete saliente ta di acuerdo cu mester habri fronteranan back pronto. “No ta posibel pa tene un isla manera St. Eustatius cera pa un cantidad di dia. Pronto henter mundo lo ta vacuna, y cos por bay back na normalidad.”
“A pesar di tur e campaña y yamada, e otro hende no ta bin”, Knops a bisa. “Ora ta trata di caso medico y hendenan seriamente enfermo, un isla manera St. Eustatius ta sali di e crisis di corona relativamente ileso. Esey ta crea un sorto di sentido falso di seguridad. Ta parce asina cu tin menos conscientisacion di vacunacion eynan.”
No tur e islanan ta bayendo mesun malo cu St. Eustatius y St. Maarten. Nobenta porciento di habitante di Saba ya ta vacuna. Na Bonaire, setenta porciento a ricibi al menos un dosis. Na Corsou, esey ta setenta porciento di poblacion. Mientras tanto, admision den hospital a redusi drasticamente.
Gobierno di St. Maarten ta purbando di pone hende vacuna a traves di campaña. Cualkier persona cu no ta vacuna despues di dia 1 di juli lo mester paga pa e vacuna.
