Pasonan hudicial ta bon tuma, awor sigui…

Desde aña pasa a cuminsa haya señal (discreto) cu gobierno di Reino tabata asina preocupa cu e situacion di corupcion den gobierno di Aruba, cu a cuminsa tuma paso investigativo. Aña 2017 a habri cu mas di un investigacion andando, entre otro esun cu a haya e nomber Ibis, y a probecha e yegada di un Procurador General nobo pa cuminsa pone cosnan den marcha. No a tarda tanto pa comunidad haya e spanto di aña cu e invasion masivo na mas di 10 adres diferente, den e caso Ibis.

Na e momento aki, cu eleccion den porta, ta presenta un aceleracion y profundisacion di henter e proceso hudicial, cu lo ta bay tin su consecuencia no pa eleccion so, sino pa gobernacion en general den e periodo nos dilanti. Hopi ta e comentarionan cu nos a scucha, cu autoridadnan mester haci pura cu e investigacionnan den e caso, y ademas cu e investigacion den e abuso di terenonan di propiedad publico, pa cual varios denuncia a ser haci na OM caba. Nos no ta mete den esey, simplemente.

Pero actualmente, unda e consecuencianan pa e partido den gobierno ta birando dia pa dia mas serio, e presion riba gobierno di Reino lo aumenta, pa bay trankil y no sigui tuma paso hudicial contra tur persona envolvi, ‘caiga quien caiga…’ Y loke nos a mira den pasado caba, cu Den Haag ta masha sensitivo pa presion y critica cu ta bay den direccion di acusacion di ‘neocolonialismo’ y di metemento den asunto interno di nos. Esey nos por a mira den e dianan turbulento di juli 2014, ora disturbio, menasa y instigacion den cara di, y contra e representante di Rey a ser tolera pa varios dia pa gobierno di Reino, pasobra tabata trata di nos prome ministro. Laga ta un di nos a bay campa dilanti oficina di Gobernador y pa colmo menas’e tambe! Ta mesora Riot comando lo a bin bari nos di e lugar. Poco dia despues di tur e berguensa aki, ata e instigador ta na Merca cu pareha Real… Aparentemente e interesnan di Hulanda, pa purba conkista un asiento den Conseho di Seguridad, tabata mas importante cu duna cara y para fuerte pa e interesnan di e ciudadanonan Hulandes na Aruba, cu tin un deseo grandi so: di gosa di gobernacion drechi.

Den e tempo despues, cada biaha por mira un maneho estilo ‘zigzag’ un momento permitiendo tur sorto di expresion for di sla di gobierno di Aruba, y na otro momento mustrando poder tumando decision fuerte, manera na e momento di nombra Gobernador, contra voluntad di nos prome ministro. Despues di e imposicion di ley cu ta regarda CAft, nos por a mira atrobe e maneho aki, cu na bon Hulandes yama ‘pappen en nathouden’, na lugar di pone bon cla ta ki interes gobierno di Hulanda ta representa. Tabatin varios momento unda diferente persona cu hopi experiencia den maneha asunto cu Reino/Hulanda tabata puntra nan mes ta kico ta guia politica di gobierno Hulandes den tur esaki. Bueno, nos por bisa cu maneho di Hulanda en general ta pa mantene e situacion den e parti Caribense di Reino ‘hanteerbaar’ (manehable). Y esey ta significa cu ta evita yega na situacion extremo cu lo exigi medida extremo na su turno. Pero si esey ta asina, anto bo no mester maniobra bo mes como gobierno di Reino den situacion unda bo no por haci nada otro cu tuma medida drastico.

Awor, nos por imagina cu tempo cu a tuma e decision den Reino/Hulanda, cu e situacion di corupcion y impunidad di mandatario no tabata tolerable mas, cu talvez tabata trata di un caso isola, cu por a maneha como un bon ehemplo pa e otronan siña. Por ta cu nan no tabata sa cu e beerput tabata asina grandi, aunke mester bisa cu nan tabatin añas ta haya informacion concreto tocante grado di groseria na cual e gobierno actual a yega. En todo caso, awor ta bira dificil pa hala atras, y lo mester haci loke mester haci. Y esey ta cu mester sigui pa haci e lugar limpi, y bon. E motibo ta cu aki e interes di nos como ciudadano drechi, cu kier biba den un berdadero estado di derecho, y no un estado di fabor cu e gobierno aki a crea, lo mester bin na prome lugar. No ta nos interes como ciudadano, cu segun bon custumber Hulandes ta busca un ‘Barbertje die moet hangen’; un ‘scapegoat’ cu ta sacrifica mientras tur e otronan ta keda sinta trankil manera nada no a pasa. E problemanan di degeneracion di gobernacion ta asina severo, cu no por pensa cu ta djis un par di mucha mala mucha tin cu ta daña pa e resto. Den e cuadro aki nos por referi na un caso similar na Brasil, unda e procurador ta acusando e partido di Lula da Silva y Dilma Roussef di a crea un ‘organisacion criminal’. Na e nivel aki, mester actua hudicialmente contra ken cu ta culpable, pero tambe drecha organisacion gubernamental. Ta di spera cu Hulanda no haya miedo pa kima curpa cu awa friu, finalmente.