Hulanda: Corte ta dicidi cu e plan pa centralisa cirugia cardiaco pediatrico por avansa

(NLTimes)—E plan di Minister di Salud Demisionario Ernst Kuipers pa centralisa cirugia cardiaco pedriatico por avansa. E universidad centro medico (UMC) di Utrecht y Leiden/Amsterdam a rechasa e plan pa cera nan departamento di cirugia cardiaco pedriatico. Pero e hues di alivio preliminario a duna huicio diabierna cu e plan actual no tin “consecuencianan ireversibel”, y p’esey no tin un motibo pa pone un pausa riba dje.

Esey kiermen cu e UMCnan lo mester discuti con pa centralisa cirugia cardiaco pedriatico den e lunanan binidero. Corte na Utrecht a dicidi solamente riba e cuestion pa pone pausa riba e plan of no. E caso lo ser maneha na fin di aña aki ora e corte dicidi di e decision di Kuipers ta hustifica. E ora e partidonan por apela contra e huicio.

Actualmente, operacion riba defectonan cardiaco den mucha ta tumando luga na cuatro luga: Erasmus MC na Rotterdam, UMC Groningen, UMC Utrecht y e Centro pa Defectonan Cardiaco Congenito (CAHAL) di Amsterdam-Leiden, estableci pa e LUMC (Leiden) y Amsterdam UMC. E Ministerio di Salud tin basta tempo cu e intencion di concentra e cirugia cardiaco pedriatico aki den dos of tres hospital. Kuipers a dicidi cu cuminsando october 2025, e cirugianan lo tuma luga solamente na e UMCnan di Rotterdam y Groningen.

Segun UMC Utrecht y CAHAL, e decision di Kuipers ya ta causando un inkietud entre pashent y empleadonan. E hospitalnan tambe a bisa cu e decision di e minister ta afecta otro cuido den nan hospital tambe.

E hues di alivio preliminario a bisa cu e inciertud ta simplemente “inherente” den e decision. Y hasta si pone un pausa riba e plan, e inciertud no lo disparce. El a agrega cu tin un urgencia pa cuminsa e transicion lo mas pronto posibel y cu e UMCnan mester a tuma pasonan caba pa esaki, como cu e minister a puntra nan pa haci esaki na fin di mei.

E minister a bay den acuerdo cu e UMCnan por warda cu preparacion cu ta rekeri inversionnan grandi. E combersacion mester ta tocante con pa mehora e calidad di cuido. Hasta di e corte dicidi na fin di aña pa cancela e plan di Kuipers, e combersacionnan aki no lo a bay perdi, segune hues.