Recientemente, Bon Dia Aruba a publica parti di un carta di Secretario di Estado pa Relacionnan di Reino, Zsolt Szabo y minister di Husticia Hulandes, David van Weel tocante e tema di estado di derecho na e islanan Caribense di Reino. E carta ta duna informacion riba e revision di e rol di Hulanda y Reino segun Articulo 1 di statuut, y ta introduci e recalibracion di e maneho aki. Mientras cu e articulo anterior, (disponible riba nos website bondia.com) a trata Articulo 1, den e articulo aki lo trata e parti di e carta dirigi riba desbalansa den cadena di ley.

Segun e carta ta menciona, ademas di e reevaluacion amplio di e maneho Hulandes pa reforsa estado di derecho den parti Caribense di Reino discuti anteriormente, tambe tin un combersacion tumando lugar entre e cuatro minister di Husticia den Reino tocante e desbalansa identifica den cadenanan di cumplimento di ley.

E topico aki, treci dilanti pa Aruba, Corsou y Sint Maarten, ta parti di nan reunion anual Quadripartite Hudicial (JVO).

Na januari 2024, e JVO a conclui cu e desbalansa aki ta manifesta den tres area:

1) Servicionan local ta enfrenta escasez di personal

2) Tin desigualdad entre inversion, ekipo y personal pa servicionan local compara cu den henter Reino y servicionan Hulandes activo den Caribe.

3) Tin diferencia entre e prioridadnan di Aruba, Corsou y Sint Maarten compara cu esnan di Hulanda.

Cumplimento di ley ta un asunto autonomo pa cada pais, haciendo Aruba, Corsou y Sint Maarten principalmente responsable pa inversion adecua den segmentonan local di e cadena hudicial. Sinembargo, e analisis di JVo ta mustra cu e refuerso di e paisnan di nan cadenanan hudicial a cay atras, y inversionnan Hulandes ta dirigi principalmente riba servicionan di Reino, manera Team di Cooperacion riba Investigacion Criminal (RST) y Wardacosta di Caribe, pa motibo di e enfoke di Hulanda riba combati crimen cu ta mina sociedad y interumpi fluho di droga. Mientras cu e servicionan aki ta mustra bon resultado, inversionnan no semper a considera e cadena den su totalidad.

E desbalansa aki tambe ta limita e efectividad di e esfuerso di Hulanda, segun e carta. Diferencianan den capacidad entre servicionan local y comun por conduci na situacionnan unda un chens eleva pa aprehension no por ser sigui door di e cadena. Un falta di capacidad den servicionan local ta nifica cu un meta clave di politica den e esfuerso Hulandes – aumenta e autodependencia di Aruba, Corsou y Sint Maarten – no ta completamente realisa.

Adicionalmente, proyectonan conhunto, hopi biaha financia pa Hulanda, ta experimenta retrasonan significante. Reduccion di e desbalansa aki ta pues importante pa tanto e paisnan Caribense como Hulanda.

Un grupo di trabao di JVO cu representantenan di e cuatro pais pa e motibo aki a desaroya solucionnan pa reduci e desbalansa. JVO na juni 2024 a aproba mas elaboracion, implementacion y monitoreo di siete solucion y a asigna un grupo di trabao nobo di JVO pa e tarea aki. A informa Tweede Kamer di e solucionnan aki a traves di e carta di feedback di JVO.

Representantenan di e cuatro Ministerio di Husticia ta sirbi den e grupo di trabao aki. Ministerio di Husticia y Seguridad Hulandes (JenV) ta bay representa Hulanda, trahando di cerca cu ministerionan di Interior y Asuntonan di Reino (BZK) y Defensa pa mantene cohesion cu e proceso di reevaluacion.

E siete solucion, enfoca riba tanto paisnan individual como cooperacion dentro di Reino, mester ser considera den su totalidad. Cada pais ta bay tin un rol den desaroya, implementa y monitoria e recomendacionnan.

Hulanda ta mira un rol principalmente den desaroya e siguiente cuatro recomendacion:

Desaroya un revision di implementacion: Ta importante pa esfuersonan futuro no aumenta e desbalansa menciona anteriormente. E revision di implementacion ta bay identifica consecuencianan potencialmente negativo pa otro partinan di e cadena trempan y sigura miho alineamento entre e capacidad di servicionan local y desplega. Tambe ta bay resalta e condicionnan necesario.

Cera acuerdonan riba sosten na comienso di e proyectonan conhunto nobo: Pa motibo di limitacion di capacidad, e paisnan Caribense hopi biaha tin problema pa implementa plan y proyectonan conhunto na tempo. Acuerdonan mas cla riba sosten pa proyecto, manera project manager, secretario, abogado (legislativo), personal di HR of purchasers ta esencial. E revision di implementacion menciona ta bay guia e proceso aki.

Mehora cooperacion (regional) den cumplimento di ley: E naturalesa di crimen cu ta mina sociedad a traves di fronteranan ta rekeri un enfoke riba e resiliencia di Reino den su totalidad. E esfuerso Hulandes ta pa profundisa cooperacion basa riba igualdad, considerando e capacidad y responsabilidadnan di e paisnan di Reino. Experiencianan positivo den cooperacion di polis ta duna un bon ehemplo.

Sigura un discusion mas strategico dentro di JVO: Pa sigura cu inversionnan ta reforsa henter e cadena, Aruba, Corsou, Sint Maarten y Hulanda mester alinea miho nan meta, interes y direccion desea pa desaroyo pa e cadena hudicial. JVO ta esencial pa e proposito aki, y trabao ta na caminda pa ahusta e formato aki pa un enfoke mas strategico.

Gobierno Hulandes tin confiansa cu si sigui e recomendacionnan aki, ta bay aumenta e efectividad di e esfuerso Hulandes.

Ademas di e recomendacionnan aki, Aruba, Corsou y Sint Maarten tambe ta bay considera tres otro recomendacion: Planea pa recluta personal, ehecuta analisis di tareanan central (kerntaakanalyse) pa e servicionan di e cadena, y haya espacio financiero den nan presupuestonan pa reforsa e cadena sosteniblemente. Hulanda ta bay tin un rol mas chikito den e procesonan aki pero ta bay duna sosten na otro miembronan di e grupo di trabao cu conocemento y experticio unda ta solicita y posible.

Conclusion
 Reino den su totalidad, y Aruba, Corsou , Sint Maarten y Hulanda, incluyendo Bonaire, Sint Eustatius y Saba individualmente, tin un interes directo den un estado di derecho fuerte y resiliente den e partinan Caribense di Reino. E esfuerso aki mester aborda no solamente cumplimento di ley pero tambe otro temanan di estado di derecho, manera integridad, bon gobernacion y reforsa sociedad civil.

Pa logra esaki, Hulanda ta bay duna sosten na Aruba, Corsou y Sint Maarten, como tambe Bonaire, Sint Eustatiys y Saba, den reforsa estado di derecho. Pa mehora sosten pa e paisnan Caribense, ministerio BZK ta trahando riba un propuesta pa revisa Articulo 1 (reforsando estado di derecho.) Esaki ta bay involucra colaboracion cercano cu ministerionan JenV y Defensa.
Ta bay informa Tweede Kamer riba esaki den prome mita di 2025.

Hulanda ta sostene e paisnan Caribense den mehora cumplimento di ley, reconociendo cu esaki ta den interes di Reino, e paisnan Caribense, y ambos e parti Caribense y Europeo di Hulanda. E contribucionnan activo di Aruba, Corsou, Sint Maarten y Hulanda pa e grupo di trabao di JVO ta crucial pa reduci e desbalansa. Hulanda ta anticipa pa continua un cooperacion fructifero den e area aki.

Pa clausura e carta, e Secretario di Estado y e Minister ta indica cu ta bay keda actualisa Tweede Kamer regularmente riba e progreso di e grupo di trabao a traves di e cartanan di feedback di JVO.