Hulanda: Conseho di salud ta urgi pa un cambio mas facil pa dieetnan vegano na Hulanda

(NLTimes)—Den un recomendacion pa e minister di agricultura, naturalesa y calidad di alimento y e secretaria di estado di salud, bienestar y deporte, e conseho di salud Hulandes a conseha diaranson cu mester ta mas facil hende opta pa mas dieetnan vegano y reduci nan consumo di carni.

E cambio aki no ta solamente miho pa medio ambiente pero tambe mas saludabel pa hende: “fuentenan di proteina basa riba animal tin un impacto mas grandi riba e medio ambiente compara cu fuentenan di proteina basa riba planta (vegano). Ademas, e consumo di algun proteina animalistico a mustra cu nan ta aumenta e riesgo di malesa cronico,” segun e conseho a skirbi.

E investigacion di e conseho di salud a sugeri cu pa inversa e trend di consumo di proteina actual, unda 60% ta bin for di productonan animalistico y 40% for di planta, lo aumenta e consumo di legumbre y reduci consumo di carni procesa. E cambio dietetico aki lo resulta den mas fiber y menos consumo di grasa satura.

Segun e conseho, e cambio pa un dieet vegano lo reduci e riesgo di malesa cardiaco, diabetes, y cancer. P’esey, e conseho a conclui cu un dieet basa mayormente di planta ta alinea miho cu e liñanan di guia dietetico Hulandes compara cu e dieet actual. “Pa mayoria hende Hulandes e transicion di proteina por ser implementa sin cu causa deficiencianan nutricional,” nan a declara.

E conseho tambe a calcula cu e cambio pa un dieet vegano lo reduci e efecto ambiental di produccion alimentario pa 25%, afectando ambos emisionnan di greenhouse gas y uzo di tereno.

E conseho a nota cu actualmente tin demasiado enfasis riba e responsabilidad di e consumidornan pa loke ta trata un dieet vegano. Sinembargo, pa facilita e transicion di proteina, e conseho ta kere cu gobierno y negoshinan mester tuma medida “cu ta enfoca riba e facilitacion pa e poblacion Hulandes pa cambio pa un dieet basa mayormente di planta.”

Como recomendacionnan, e conseho di salud a sugeri pa haci productonan vegano presente den supermercadonan y reduci e tamaño di pakinan di carni. Tambe el a recomenda mas training pa trahadonan di catering, particularmente den institucionnan di cuido, pa sigura un dieet saludabel pa residente.