Na 2018 a detecta na Hulanda casi 10.000 miyon euro na transaccion fraudulento, loke ta un record te awor. Ta trata aki di sospecho serio di labamento di placa, hopi biaha di placa di droga, y di financiamento di terorismo.
Esaki a aparece den un relato anual di e Financial Intelligence Unit (FIU). Esey ta e autoridad cu ta opera di forma independiente y ta staciona den cuerpo policial, unda proveedornan di servicio financiero segun stipulacion legal mester notifica di transaccion financiero cu nan no ta confia. FIU ta analisa e notificacionnan y ta duna esakinan, si ta necesario, e titulo ‘sospechoso’.
Na 2018 e autoridad a constata 58.000 transaccion sospechoso, na un balor di 9,7 biyon euro. Na 2017 tabata trata di 40.000 transaccion y 6,7 biyon euro. Ta trata di notificacion di deal financiero cu despues di analisis y investigacion ta keda riba e ‘filter’ di FIU. Un mansion cu via un banco na Dubai ta ser paga di e benta di un prenda antiguo. Un suma di 100.000 euro cu ta transfer den sumanan chikito pa un exportado di bacoba na Suramerica.
Ta pasa e casonan pa Polis, Ministerio Publico y FIOD. No semper ta posibel pa detecta kico e instancianan di investigacion ta haci seguidamente cu e informacion ey. Tampoco ta conoci cuanto di e placa fraudulento aki ta ser confisca. Fuentenan di de Volkskrant ta bisa cu Polis ta haci uzo di e informacion di FIU solamente den casonan bao investigacion.
