Hulanda: Caracteristicanan di autismo y descapacidadnan tras di hopi peticion pa eutanasia

(NLTimes)—Hopi peticion pa eutanasia na Hulanda a ser provoca pa caracteristicanan asocia cu descapacidadnan pa siñamento y autismo, segun un estudio pa Kingston University na Inglatera.

E investigadonan, lidera pa Irene Tuffey-Wijne, un profesor di descapacidad intelectual y cuido paliativo, a observa 900 casi di reportahe di eutanasia y suicidio asisti entre 2012 y 2021 na Hulanda. E casonan aki tabata den e database publico. Nan a descubri cu 39 caso tabata envolve hende cu of descapacidad pa siñamento of autismo, of ambos.

Segun e investigadonan, aproximadamente dos tercer di e grupo aki a scoge eutanasia “solamente, of mayormente, pa via di caracteristicanan asocia cu nan condicion,” manera ansiedad of e sentimento di ta apart di sociedad. Den 8 di e 39 caso, e motibonan pa sufrimento teribel di hende tabata “exclusivamente relata” na autismo of un descapacidad pa siñamento. Nan a sinti “incapaz pa deal cu e mundo, cambiamento rond di nan, y nan tin dificultad pa cera amistad of pa tin un conexion cu otro hende.”

Un otro 8 caso a envolve hende cu a bisa cu nan descapacidad pa siñamento of autismo a haci’e dificil pa nan deal cu otro condicion fisico. E mesun cantidad a bisa cu nan condicion, combina cu problemanan di salud mental, tabata e motibo pakico nan kier pone un fin na nan bida. Den un tercer di e casonan, dokternan a nota cu e autismo of descapacidad di e persona no tabata tratabel, cual tabata un consideracion crucial pa determina si tabatin prospecto of mehoracion.

Di e personanan den e 39 caso, 77% a lista soledad como un di e causanan di nan sufrimento, cual a pone nan puntra pa suicidio asisti. 62% a lista dependencia riba otro, 56% tabatin falta di resilencia of manera pa deal cu nan bida, y 44% tabatin un falta di flexibilidad y dificultad pa adapta na cambio.

Segun profesor Tuffrey-Wijne, nan descubrimento a mustra e necesidad pa un debate internacional filosofico y etico riba e criteria pa eutanasia y con pa handle cu peticionnan asina for di gruponan vulnerabel. El a bisa cu esaki tambe a subraya e importancia pa servicionan di sosten rond mundo.