E Bisdom na Haarlem ta exigi pa e pastoor di Amsterdam Pierre Valkering, kende ta abiertamente sexual, retira por lo pronto. Esaki a sosode despues cu Valkering a admiti abiertamente di su preferencia sexual durante un sirbishi di conmemoracion pa su hubileo di 25 aña.
E pastoor Valkering a termina su sermon papiando di e ‘olifante roos grandi’ cu tin den misa Catolico. Cu esaki e ta referi na e echo cu tin hopi pastoor Catolico cu ta homosexual. Den un entrevista cu e revista HP/De Tijd, e ta bisa cu tin un cultura di miedo y silencio rond di e tema di homosexualismo. “Mi a sufri hopi pa motibo di e silencio aki”, Valkering ta bisa.
Segun e Bisdom di Haarlem, haciendo esaki Valkering ta hacie publicamente conoci cu e ta kibrando su promesa di celibaat y no ta pensa di mantene su mes na esaki. “Mas ainda e ta compromete su mes na otro libertadnan sexual. Esaki pa e Iglesia Catolico no ta algo aceptabel, mas ainda den un pocision di pastoor”, un vocero di e Bisdom a duna di conoce.
Un investigacion haci recientemente door di sociologo Frédéric Martel a demostra cu un parti grandi di miembronan/lidernan religioso di e Vaticano ta homosexual. Valkering tambe ta bisa cu mayoria bes ta hombernan homosexual ta esnan cu ta kies pa e profesion di pastoor Catolico. Segun ambos (Martel y Valkering), door di scoge pa e profesion nan ta busca manera pa sconde y/of acepta nan preferencia sexual.
