Recien tabatin dos caso riba cual Minister di husticia, Andin Bikker (POR) a reacciona riba dje, un den cual ta denuncia acto corupto di agentenan di Guarda Nos Costa y e otro ta relaciona cu un persona cu a pidi asilo na Aruba y cu kier a bay via Hulanda pa yega Spaña, pero Hulanda a nenga nan di subi avion. Nan a aplica e modelo Dublin.

Den un declaracion duna siman pasa durante fin di siman, un persona cu fam Genao, cual segun minister a keda deporta na februari ultimo, a duna cierto nombernan di agente di Guarda Nos Costa kende supuestamente lo ta envolvi cu bendemento di asilo politico. Entre otro, a menciona F. Kock y M. Ras, dunando di conoce cu lo tin un cantidad di mas o menos 6 agente di e cuerpo aki cu ta envolvi cu e supuesto negoshi. Miembro di Management Team di Guarda Nos Costa y actual hefe a refuta e declaracionnan aki.

Sinembargo, Bikker ta indica cu tin un investigacion di echonan cu a cuminsa, cual Prome Minister Evelyn Wever-Croes (MEP) tambe a pidi e mandatario pa haci. Supuestamente Genao lo a ricibi promesa cu lo stop di persigui su persona pa no keda deporta si e por a trece na cla ken ta bendiendo asilo politico. Esaki Bikker a refuta tambe, bisando cu no tin tal maneho pa haci promesa a cambio di haci excepcion pa deportacion. “Mi no conoce ni tabatin contacto cu e persona aki.”

E minister ta haya cu frecuentemente ta purba baha credibilidad di trahadonan di departamentonan di Migracion y di Guarda Nos Costa, ‘pa por haya meldplicht por ehempel, manera tabata caso un par di luna atras ora hende a keha cu e cuminda na GNC no ta bon’. Pues pa e rason aki ta bay institui un comision di keho (klachtencommissie) cu lo evalua e tipo di kehonan aki den casonan di detencion tanto di KIA como di personanan cu GNC ta haya sin status regular pa keda na Aruba.

Lo ta dificil pa peticionario di asilo bay Europa a base di modelo Dublin
Den otro caso cu a pasa cercano na e momento cu Genao a duna declaracion, un famia Venezolano cu a pidi asilo aki na Aruba a purba bay Hulanda. “Contrario na loke a sali den cierto medio cu Guarda Nos Costa lo kier a stroba nan partida, no tabatin ningun strobamento. Loke nos a tuma nota di dje ta cu Hulanda a screen si un persona cu intencion pa yega Hulanda mester bay bek di unda nan a biaha”. A base cu un persona tin un peticion di asilo pendiente, cu e modelo Dublin, e persona no ta haya chens pa aplica na otro pais si ya ta conoci cu e tin un aplicacion pendiente na otro pais.