(NLTimes) – Ora Universidad di Oxford a pidi Hulanda pa inversion di dies miyon euro na planta di vacuna Halix na Leiden, a habri porta pa e pais, y probablemente henter Union Europeo, haya acceso na miyones mas dosis di vacuna di Covid-19 compara cu loke AstraZeneca a entrega na UE den prome kwartaal di 2021.

Cientificonan di e universidad tabata algun dia leu di sigura sosten di e compania farmaeutico pa su vacuna AZD 1222 na fin di april, na momento cu a acerca Hulanda cu e solicitud, segun fuentenan anonimo a bisa noticiero NOS.

Facilidad Halix ya tabata bao contract pa produci e vacuna di Oxfors hasta mientras testnan clinico tabata intensifica. “Probablemente lo tin un gran demanda pa vacuna si nan pasa e test exitosamente. Mas probablemente, e cantidad di vacuna disponibel lo ta limita pa varios luna”, un carta di e universidad, ricibi pa prome minister Mark Rutte, a declara. “Pa evita retrasonan mayor, mester aumenta capacidad di produccion awo.”

E noticiero a mira elementonan clave di e carta, cual a bisa cu e inversion lo ser usa pa reduci ‘bottlenecks’ na facilidad di Halix. Na e punto ey, gobierno Britanico ya a compromete na un inversion di 25 miyon euro na e planta Halix na Leiden, haciendo posibel pa produci barinan di 200-liter di un vacuna.

E inversion Hulandes lo a permiti e facilidad aumenta esaki pa asina por entrega bari di mil liter.

E fuentenan a provee informacion y contexto, pero no tabata dispuesto pa bay riba record, den parti pa motibo di acuerdonan di secresia (non-disclosure agreement). Nan a bisa cu e situacion a cuminsa na momento cu un investigador di Oxford a acerca parlamentario di CDA, Pieter Omtzigt. Despues el a discuti esaki na oficina di Rutte dia 28 di april, un combersacion cu oficina di asunto publico di gobierno a confirma. E siguiente dia, a manda un carta directamente na prome minister.

Un dia despues, AstraZeneca y Oxford a anuncia cu e compania farmaceutico tabata sosteniendo e desaroyo di vacuna Covid-19 di e universidad. Hulanda a haci esfuerso pa yega na un acuerdo cu Halix varios biaha na fin di april y comienso di mei, pero no a logra resultado mientras AstraZeneca a pone su propio placa den e planta Halix na Leiden.

Loke e gabinete no a haci tabata tuma contacto cu esnan di e universidad kende a manda e carta na Rutte na prome luga. Si nan lo a haci esey, Oxford probablemente lo a acepta e inversion, segun fuentenan na Reino Uni a bisa NOS.

Esey lo a haci posibel pa gobierno Hulandes reserva capacidad di produccion na Halix, potencialmente evitando e disputa comercial actual entre Union Europeo y Reino Uni. Pa e proximo kwartaal, AstraZeneca a bisa cu lo entrega solamente 40 porciento di e cantidad acorda di dosis di vacuna di coronavirus na Area Economico Europeo (EEA), bisando cu mester cumpli cu compromisonan cu Reino Uni prome.

Esaki ta inclui dosis di e vacuna produci na Leiden. Como respuesta, Union Europeo a bisa cu por prohibi exportacion di e vacuna for di Estadonan Miembro na otro paisnan, cu excepcion di esnan destina pa e plan global pa provee vacuna na e paisnan di menos recurso.

Minister di Salud, Hugo de Jonge, a wordo gara di sorpresa ora noticia a sali cu AstraZeneca probablemente lo entrega mita di su target te cu juni. AstraZeneca tambe a entrega substancialmente menos dosis di vacuna na UE durante prome kwartaal, pero UE probablemente no lo por ataca e asunto legalmente pa motibo di e terminonan generoso den e contract di compra.

Maske un potencial inversion Hulandes den vacuna di Oxford lo haci mas complica pa motibo di participacion di e compania Ingles-Sueco, potencialmente lo a paga significantemente cu acceso mas amplio na dosis di vacuna Covid-19 asina desesperadamente necesario un aña despues. Te cu dia 30 di maart 20201, Hulanda a duna proteccion di vacuna al menos parcial na 11.7 porciento di su poblacion adulto, compara cu e averahe di UE/EEA di 12.3 porciento.

Den comparacion, Reino Uni a vacuna mas di 30 miyon adulto cu un prome dosis, mas di 58 porciento di su poblacion adulto.