Hasta si bo a registra como donante di organo, por ta cu esaki no ta sucede. Den prome mita di 2019, famia di e fayecido den 20% di caso a nenga di haci donacion di organo, maske e donante a scoge esaki specificamente. Pa e motibo aki, despues di consulta cu dokter, e donacion no a bay door.
Segun e ley di donacion, famianan por semper entrega un obhecion contra donacion di organo, hasta si e deseo di e fayecido tabata pa dona su organonan. Ta keda e ora ey na e dokter pa tuma un decision a base di e obhecion. Na 2018 e porcentahe di famia cu no a bay di acuerdo cu un registro di donacion positivo tabata di 11 porciento.
No ta cla pakico famia y amigonan awo mas comunmente ta bay contra deseo di e fayecido, segun vocero di Nederlands Transplantatie Stichting, Yvette Hoogerwerf. “E combersacionnan aki ta bay den cada caso, cada bes ta otro. Dokter ta midi e deseo di e famia contra e deseo di e donante.”
Casi 6.7 miyon (44 porciento) di Hulandesnan di 12 aña y mas grandi, te na e momento aki a registra nan escogencia den registro di donante. Esey ta 508mil mas cu na februari 2018, ora cu e ley nobo a drenta vigor. Mas di mita (3.8 miyon) ta donante. Alrededor di 2.1 miyon di persona a laga sa cu nan no kier haci donacion di nan organo, y alrededor di 750mil Hulandes ta laga e decision na nan famia.
Algun persona ta scoge specificamente pa no yena e registro te cu dia 1 di juli proximo aña, segun reaccionnan riba e pagina di NOS. For di e momento ey nan lo wordo cualifica como ‘sin obhecion’, precisamente con nan kier. Toch segun Hoogerwerf lo ta miho si nan a tuma un decision caba. “Si e famia sa di nan decision den e registro, esey ta yuda.”
Pa laga mas persona specifica nan escogencia via donorregister.nl, e siman aki ta cuminsa un campaña nacional nobo.
