Fundacion Parke Nacional Aruba por regula trafico di motor den e teritorionan bou su maneho y como tal, tin e derecho pa limita acceso di ATV’s den e reserva natural.

 

Ayera Huez Jack Verhoeven a rechasa e ponencia di Aruba Offroad Foundation, AORF, cu a demanda pa FPNA y Minister di Medio Ambiente hala atras di e decision tuma pa limita trafico di motor, particularmente vehiculonan di tur tereno di drenta e areanan cu ta cay bou maneho di e entidad.

 

Huez a argumenta cu e Natuurbeschermingsverordening y  e ley riba cua Parke Nacional Arikok ta basa ta pa proteha flora y fauna den peliger di extinccion y como tal a asigna e tereno como un reserva natural.  Y como tal, por pone regla riba maneho y acceso na e areanan natural.

Parke Nacional Arikok ta considera oficialmente un reserva natural desde aña 2000 y na 2004, a apunta un instancia oficial pa maneha e parke, cu ta inclui tambe tur caminda publico den e area. E instancia ta Fundacion Parke Nacional Arikok, cu mientrastanto a bira Fundacion Parke Nacional Aruba, cu tin e responsabilidad pa mantene biodiversidad, ambiente natural pa medio di proteccion y eventual desaroyo y enrikecimento natural. Ley ademas ta duna FPNA e tarea pa implementa su responsabilidad cu plan di maneho.

 

Accesibel

Parke Nacional Arikok en principio ta accesibel pa tur hende. Pero e operado, cu ta FPNA, tin e autoridad pa limita e accesibilidad na e camindanan publico den concordancia cu DOW y Cuerpo Policial, si esaki ta necesario pa cumpli cu su responsabilidad di proteha e reserva natural. Y e responsabilidad aki ta inclui e 16 terenonan cu a keda agrega bou maneho (comparti) di FPNA, dia 5 di Mei 2020.

 

Basa riba e mandato aki, FPNA a sera acceso via Butucu, Rooi Koochi, Savaneta, Jara, Sabana Basora, Rooi Taki, Jamanota, San Fuego, Arikok, Shete, Sero Loren, Daimari y Vader Piet. Tur vehiculo di motor mester drenta via entrada principal na San Fuego y tambe na Vader Piet, despues di paga.

 

FPNA ademas ta instrui segun ley pa bin cu plan di maneho strategico cada cinco aña, cu tin como punto principal e tarea di proteha naturalesa. Y esey ta inclui e autoridad pa limita acceso na cierto caminda, cu a pone huez hala un banda un di e argumentonan principal di e fundacion, esta cu  Minister di Medio Ambiente no por permiti cu ta sera caminda publico.

 

AORF

Aruba Offroad Foundation ta operadonan di tour cu ta usa ATV den caravana  y ta usa mas tanto e camindanan di santo direccion Conchi y grotnan den Parke Nacional Arikok.

 

FPNA a publica su documento di maneho ‘Managing Nature Conservation & High Impact Motorized Traffic’ dia 7 di Mei, cu ta parti du su masterplan integral pa sostenibilidad, unda kier stimula recreacion di impacto abou y regula vehiculonan di impacto halto. E maneho ta consisti di tres fase, cu ta regulacion y reduccion di trafico di aventura na cantidad halto, den areanan di proteccion.

 

E di dos ta para tur vehiculo motoriza, cu excepcion di SUV, pickup, van, y auto compacto individual. Ademas a produci e Environmental Impact Report for Offroad Driving cu ta ilustra e impacto negativo grandi riba naturalesa.

AORF a pidi dia 27 y 29 di Mei pa no ehecuta e maneho aki, ya cu no a tene cuenta cu nan interes. Dia 18 di Juni, AORF mester a manda un lista di proposicion unda ta indica con un ATV/UTV por bira menos dañino pa medio ambiente y e area natural. FPNA dia 27 di Juni a pidi e asociacion e lista di tur reservacion pa 2020, algo cu segun e fundacion di offroad, ta irelevante. E partidonan no por a yega na otro.

 

Daño na naturalesa

Algo cu sigur a yama atencion den e sentencia ta cu huez a bay contra AORF cu FPNA no por a demostra e daño na flora (y fauna) cu e caravananan ta causa. Huez a considera cu debidamente a demostra esaki, parrticularmente ora cu FPNA por a demostra con a bin un recuperacion durante e periodo cu e parke tabata sera. Huez Verhoeven a bisa cu tin un relacion entre ‘offroad driving’ y efectonan negativo pa naturalesa. Y FPNA den cuadro di su responsabilidad pa cuida, por bin cu maneho pa limita entre otro, acceso di vehiculonan.

 

Playground

Prome cu e crisis di Covid, no menos cu 715 ATV/UTV, 100 caravana, tabata drenta e reserva natural a base diario. Den comparacion, e tournan di Jeep tabata 6 grupo di 2. Pues pa dia, FPNA tabata registra 715 ATV/UTV y 12 jeep.

 

Mr. Verhoeven a bisa cu e ta un hecho cu ATV ta lanta mas stof y ta produci mas zonido cu Jeep y ta e responsabilidad di FPNA pa limita e molesternan aki. Mas ainda, impacto di e caravannan di ATV y UTV tin mucho mas grandi cu bishita incidental di individuonan, por ehempel pa e anochi di pelicula y pa wak strea.

 

E crecemento exponencial di e tournan di UTV/ATV a sorprende FPNA y operadonan mas bien a dicidi riba nan mes pa hisa e cantidad na un forma drastico. Huez a considera cu ta e miembronan di AORF a considera cu un reserva natural a bira un “playground pa tournan offroad.”No ta pasobra a dicidi pa organiza tours, por forsa FPNA pa acepta esakinan, ta e pensamento di mr. Verhoeven.

 

E operadonan di tournan di offroad ademas mester tabata sa di e sentimento cu tabata biba den comunidad, particularmente cerca e NGO’s cu ta traha pa preservacion di naturalesa y tambe habitantenan cu ta biba cerca di areanan unda nan tour ta pasa. Tur tabata protesta regularmente contra e molester di stof y zonido. Mas ainda, e operado por sigui drenta e reserva natural, pero cu otro vehiculo di menos impacto. Y esaki ta conta pa Parke Nacional Arikok y e otro 16 terenonan cu awor ta resorta bou FPNA.