Huez di Promer Instancia, den un caso civil cu pa casualidad a ser detecta den e registro di sentencia hudicial, a expresa critica severo riba e ex-mandatario encarga cu Infrastructura y Planificacion, actual parlamentario O. Sevinger, alavez principal sospechoso den e caso Avestruz cu lo ta den Corte di Promer Instancia proximamente. Ta trata di un caso civil, di december 2021, cu a sigui despues cu mas tempran den aña 2021 tabatin un veredicto den e caso di obhecion den cual un compania local, Ocean Eco Cleaning and Supplies VBA, a entama contra Pais Aruba, despues cu e gobierno sucesor di esun di cual Sevinger tabata forma parti, a nenga di ehecuta un decision faborable di e ministro di e tempo ey, tuma den ultimo dianan di su gobernacion. E practica aki, ampliamente conoci como ‘afscheidsbeleid’ segun e huez ta algo intolerable y su veredicto tabata corespondiente.

Na 2014 e compania a haci un peticion pa por huur dos parcela y e viviendanan riba nan, cu tabata propiedad publico den e bario Sero Colorado. Tabatin un convenio di huur por escrito desde december 2015, y na januari 2017 caba e compania a haci otro peticion pa cumpra e propiedadnan di Pais Aruba. Tramite pa esey tabata na caminda, pero alavez e compania a duna di conoce cu tabata su intencion pa tumba e casnan y bay desaroya e area pa construi un compleho di apartamento. Segun argumentacion di abogado di gobierno, no por pasa pa compra di e propiedadnan promer cu vence un periodo di 3 aña di huur, cu cual norma no a cumpli. Ademas e compania no tabatin plan pa mantene su mes na e condicion di e emision di erfpacht, cu den caso di compra, cu tabata solamente pa mantene e caracter di vivienda di e dos propiedadnan.

A pesar di esaki e ministro di e tempo ey a laga prepara un acta di compra y emision di erfpacht pa e parcela y viviendanan, cu no a cana e caminda via notario, pasobra e ministro di e gabinete nobo na november 2017 a laga para e proceso di benta. Huez tambe a tuma nota cu e peticion pa cambio di e ‘bestemming’ di e propiedadnan , fecha dia 25 di october 2017, riba e mesun dia a haya e famoso frase “dezerzijds geen bezwaar gaarne uw medewerking”. E mesun frase aki a aparece riba varios otro documento cu den cuadro di e denuncianan cu a conduci na e caso Avestruz, a sali den prensa local. E peticion na ultimo ora, dos dia despues di firma e convenio di benta, tabata pasobra e compania a comprende cu di ningun manera lo por a usa e propiedadnan pa e metanan nobo, si no logra cambia esaki promer cu e traspaso tuma lugar. De hecho e compania lo mester a cana e caminda di peticion di un tereno comercial, cu ta mara na e proceso di ‘optie’. E proceso hiba tabata parce un intento pa evadi e proceso normal pa tereno comercial, segun huez.

Den e defensa di Pais Aruba ta haci mencion di otro anomalia, manera e reduccion di e prijs cu a establece aanteriormente pa compra di e propiedadnan, a base di taxatie, sin cu tabatin un splicacion pa esaki. Entre e dos propiedadnan a reduci e prijs cu mas di Afl. 30.000,- loke segun Comptabiliteitsverordening no ta permisible sin mas. Ta considera e reduccion un ‘schenking’ algo cu mester keda regla pa ley (landsverordening), un proceso cu no a entama nunca. Fuera di esey DIP a constata cu e compania nunca a tuma posesion berdadero di e parcelanan como inquilino y cu a consecuencia di esaki nan estado a bay atras hopi loke a ocasiona un perdida di valor.

Huez den su sentencia a referi na e pregunta cu si por deduci di e sucesonan encuanto e convenionan di erfpacht, si ta trata di un asina yama ‘afscheidsbeleid’. Di esaki e huez ta bisa “cu ta comprende cu poco promer cu cambio di gobierno ta tuma decisionnan di contenido dudoso cu e aparente motivacion pa pone e siguiente gobierno, di cual por supone cu e no lo tuma tal decision, dilanti un hecho consumi, cu tur consecuencia di esey pa e escazo bienes y medionan publico Arubano. Tipo di anomalianan aki lamentablemente ta sucede na e pais aki cu cierto regularidad y ta ocasiona cu den cierto caso, tumando na cuenta tambe e escala chikito di e comunidad Arubano, den interes general, un control hudicial di contenido riba entre otro pureza di intencion mester haya un enfasis extra. Den tur esaki mester conta tambe cu, tambe segun derecho no skirbi di Aruba, lo ta corecto cu un gobierno cu ta sinta ainda, despues cu e votador a papia y un gobierno nobo di otro signatura ta na punto di inicia, ta mantene un cierto grado di reserva encuanto e decisionnan cu mester tuma. Esey ta conta mas ainda si ta trata, manera den e caso aki, di un asunto no urgente cu por a warda riba tramitacion pa e gobierno cu ta sucede.”

Huez a considera tambe cu e accion di e ministro demisionario – cera e convenio di benta – ta un violacion asina serio di principionan fundamental di e orden legal di Aruba y di bon gobernacion cu considera e decision nulo y no valido a base di articulo 3.40 di Codigo Civil ta completamente na su lugar. Huez ta haya e forma di actua di e ministro demisionario, sin splicacion al caso, mas cu dudoso/incomprensible. “Esaki tambe tumando na cuenta e velocidad increible cu cual a tuma e decision, mientras otronan mester warda luna, si no ta aña y cu a resulta ta cu previo e decision ministerial no tabatin nada di e cautela cu e ministro mester a eherce, ni cu tabatin di antemano algun investigacion di su empleadonan publico.”

Cu e sentencia aki, no pa promer biaha, ta resulta den corte cu e ex-ministro aki no ta haci caso di reglanan di bon gobernacion cu lo mester ta su guia den su posicion. Den e caso Avestruz e acusacionnan ta bay hopi mas leu cu den e asunto aki, unda no tabatin consecuencia hudicial pa e accion ilegitimo aki.