Dos asunto importante a sucede den e sentencia di huez ayera den e caso di apelacion di fundacion ABC contra gobierno di Aruba, specificamente ministro encarga cu Infrastructura. Huez no solamente a honra e demanda di ABC pa declara e apelacion como funda, sino tambe a anula e decision negativo di gobierno riba e obhecion di ABC.

Mas importante ainda ta e veredicto cu gobierno no tabatin base legal pa duna e permiso na Natura NV, pasobra e denominacion di e tereno oconcerni no ta cay bao di e categoria di ‘strand’ sino bao di ‘marine zone’. Segun huez e propio reglanan di ley, Landsverordening Ruimtelijke Ontwikkeling, y e reglanan specifico pa e area concerni, no ta permiti e tipo di construccion pa cual gobierno a duna permiso, cu ta dos dam cu lo a construi di baranca di graniet di 45 meter cada uno, pa trece cambio desea den coriente natural di lama na e lugar.

Caso den corte

E caso ta trata e desaroyo di e beach dilanti Embassy Suites di desaroyador Natura NV.

Segun vonnis, den e veredicto e Corte ta evalua e decision di e minister [red: den e caso aki, Sra. Evelyn Wever-Croes] pa otorga Natura un permiso di construccion cu condicionnan pa eleva of nivela e fondo di lama pa reclama beach y pa construccion di dos ‘jetties’. Den un decision fecha 16 di juni 2023, e minister a otorga e permiso di construccion aki. ABC tabatin obhecion contra e decision aki y a solicita un pedida provisional, cual a haya su audiencia den un sesion dia 18 di october ultimo. Riba e dia aki, e minister tambe a tuma decision riba obhecion di ABC, pa e motibo aki, e partidonan a haci acuerdonan durante e sesion regardando e consideracion simultaneo di e solicitud pa un medida provisional y e apelacion di ABC contra e decision riba e obhecion. Corte a scucha e apelacion di ABC contra e decision riba e obhecion fecha 18 di october 2023, y conhuntamente e solicitud di ABC pa un medida provisional dia 1 di november 2023.

ABC tabata representa pa su presidente, G.M. Peterson y su representante autorisa. E minister tabata representa pa su representante autorisa, y ademas, den nomber di minister di DIP, M. Chikito, S. Croes y E. Maduro, y for di DNM, G.R. Boekhoudt y R. Gibbs tabata presente. Tambe Natura NV, desaroyador di Embassy Suites, a conta cu su representantenan.

A otorga e permiso pa creacion di un beach, mientras cu e tereno cubri den e aplicacion, segun e ROPV, ta designa como un Zona Marino. E designacion aki no ta permiti e creacion di un beach. E ‘golfbreker’nan ta considera como structura bao di ROPV, y sin un ontheffing, no por construi dentro di e area designa como Zona Marino. E minister cu mester a entrega un ontheffing, den e caso aki minister di Naturalesa, Ursell Arends, no na haci esaki.

Desaroyonan
 Na 2018, Natura a cuminsa construccion y desaroyo di un proyecto di hotel di luho consistiendo di 330 camber cu pool, casino y otro amenities. E hotel Embassy Suites awo ta operacional. Natura a construi un tunnel riba propiedad di Embassy Suites cu ta core bao J.E. Irausquin Boulevard y ta sali riba e beach cerca di e hotel.

Den un carta fecha 19 di augustus 2022, Natura a aplica pa un permiso di construccion pa expansion di e beach riba terenonan pa Embassy Suites. Cu un decision fecha 16 di juni 2023, e minister [di Infrastructura y Desaroyo Teritorial] a otorga e permiso di construccion.

Pero cu un veredicto sumario di Corte fecha 19 di juli 2023, a prohibi Natura di continua cu e construccion di e beach den area pa cual a obtene e permiso, sin obtene un ontheffing segun Articulo 8 di Ordenansa di Conservacion di Naturalesa. Y pues dia 18 di juli 2023, Natura a solicita e ontheffing. Te cu dia 1 di november 2023, ainda no tabatin un decision riba e solicitud pa ontheffing aki.

Den e aplicacion pa construccion di e jetties, e minister y Natura a splica cu ambos jetties lo ta construi door di pone piedranan grandi di granite natural banda di otro y riba otro.

Apelacion exitoso
 ABC a argumenta cu e tereno cubri pa e permiso di construccion den e ROPV ta designa como Zona Marino. E construccion di un beach ta den violacion di e designacion aki. Segun ABC, e minister mester a nenga e permiso di construccion pa e motibo aki. Ademas, segun ABC, e creacion di un beach ta daña e balor natural, ecologico, arkeologico, cultural, historico of geologico di e sitio of su cercano.

Corte ta considera e punto aki di apelacion exitoso, argumentando cu Articulo 23, paragraf 5 di Lro ta stipula cu por nenga un permiso di construccion solamente si e trabao ta den violacion di regulacion of rekisito estableci bao e regulacionnan aki. Articulo 5.1 subparagraf b di e regulacionnan di ROPV ta specifica cu minister por otorga e permiso di construccion solamente si e no ta daña e balor natural, ecologico, arkeologico, cultural, historico of geologico den e area of su alrededor.

Articulo 29 di ROPV ta trata e designacion “Zona Marino,” unda e prome paragraf ta specifica e funcionnan permiti den e designacion aki. Basa riba esaki, su funcion principal ta conservacion, restauracion, desaroyo y maneho di balornan natural y ecologico existente, y e conservacion, restauracion y desaroyo di baloronan cultural-historico. Ademas, ta permiti tres forma di uso comparti: recreacional den dia; cu interes economico na e sitio; y cu interes turistico na e sitio.

Den opinion di Corte, e construccion di e beach no ta alinea cu e funcionnan menciona den e designacion di Zona Marino. E construccion actual di un beach probablemente lo ta contra e funcionnan specialmente enfoca riba conservacion, restauracion y desaroyo di balor presente den e zonanan marino. Adicionalmente, tin un designacion separa “Beach” den ROPV cu otro funcionnan permiti, indicando un distincion entre Zona Marino y Beach. Den opinion di Corte, esaki ta indica cu e construccion di un beach no ta alinea cu e funcionnan asocia cu designacion di Zona Marino.

Corte tampoco tabata di acuerdo cu e ponencia di e minister y di Natura, cu e construccion di un beach ta cay bao “uso comparti cu interes turistico.” Pa prome, e no ta alinea cu e structura di ROPV, y pa di dos, e termino “uso comparti” ta implica cu e uso mester ta subordina na e funcion principal.

Natura a splica cu su aplicacion ta bay prome cu establecemento di ROPV, y cu no tabatin mester di un permiso. Pero corte no tabata di acuerdo, ya cu en esencia, e splicacion di Natura ta presenta motibo independiente pa un apelacion contra e permiso di construccion otorga, y mester a entrega e apelacion aki den Corte. Como partido tercero, Natura por solamente responde na e apelacion di ABC.

ABC tambe a argumenta cu e ROPV no ta permiti construccion di structura, y ta considera e jetties como structura segun definicion den ROPV. E argumento aki tambe tabata exitoso.

Consecuencia

Como consecuencia di e apelacion exitoso, e decision fecha 18 di october 2023 mester keda anula, y ademas, Corte ta anula e aplicacion di Natura pa un permiso di construccion.
Ya cu e corte ta dicidi riba e apelacion, no tin motibo pa otorga un medida provisional, pues corte ta rechasa e solicitud di ABC pa esaki. Corte a duna orden pa e minister paga e gastonan legal di ABC.

En conclusion, e decision di hues ta declara e apelacion di ABC exitoso; ta anula e decision riba obhecion fecha 18 di october 2023; ta revoca e permiso di construccion emiti dia 16 di juni 2023; ta rechasa e aplicacion di Natura pa un permiso di construccion; y ta duna orden pa e minister paga e gastonan legal di ABC.

E partidonan por apela dentro di seis siman den LAR.

Reaccion di minister di Naturalesa

Bon Dia Aruba a tuma contacto cu minister di Naturalesa, Ursell Arends, pa pidi su comentario tocante e resultado aki. “Ningun hende ta riba ley,” el a bisa. “Naturalesa no ta contra progreso… pero tampoco por ta victima.”