Diamars ultimo, hues a duna su veredicto den e caso di Aruba Birdlife Conservation (ABC) contra Natura NV, desaroyador di Embassy Suites, pa stop construccion di un beach ya cu tabata contra leynan di proteccion di especienan nativo di Aruba. Aki bao un resumen di e vonnis.

Aruba Birdlife Conservation tabata representa pa su abogado hunto cu Mr. G.M. Peterson, presidente di ABC. Natura tabata representa pa su abogadonan. Ambos partido a presenta nan argumento den dos ronda – cada un a entrega y presenta un declaracion por escrito compaña pa exhibicionnan admisible – y a responde na e acusacionnan di otro. Ademas nan a contesta pregunta di Corte.

Segun e vonnis, Natura a cuminsa e construccion y desaroyo di un proyecto di hotel di luho na 2018, consistiendo di un hotel di 330 suite cu pool y amenidadnan extenso, un tunnel bao tera pa haya acceso sigur na e beach otro banda di caminda, y e provision di facilidadnan standard pa beach na huespednan di e hotel, entre otro. E hotel actualmente ta operacional.

Bao orden ministerial di Minister di Asunto General, Innovacion, Organisacion Publico, Infrastructura y Desaroyo Teritorial, fecha 16 di juni 2023, a otorga un aanlegvergunning na Natura. E orden aki ta menciona, entre otro, e aplicacion di Natura Development NV pa un permiso di construccion di un beach riba tereno di gobierno west di e parcelanan conoci como di Dos Division, Seccion C, number 4255 y 4386 na Palm Beach “sin mester crusa caya.”

Tabatin varios consideracion, manera e ubicacion cu ta bay yena den awanan teritorial di Palm Beach ta den un area cu designacion di “zona maritimo di importancia turistico” segun e ROPv. Tambe cu e expansion ta cumpli cu e ROP 2019 y ROPv. Actualmente segun e vonnis Aruba no tin suficiente santo disponible pa construccion of reabastecemento di beach. A considera pa otorga e permiso pa eleva of nivela suelo di lama en conexion cu realisacion di expansion, construccion y reabastecemento di un beach den awanan teritorial nort west di Embassy Suites y Divi Phoenix bao condicionnan.

E condicionnan ta inclui cu segun conseho di Departamento di Naturalesa, ta prohibi segun Decreto pa Proteccion di Flora y Fauna indigena, pa elimina of haci daño na especienan nativo protegi, completa- of parcialmente, sin un ontheffing di minister di Integridad, Naturalesa, Transporte y Asuntonan di Adultonan Mayor.

E vonnis tambe ta menciona cu mester preserva e vegetacion existente (mangel y fofoti) riba e beach, y cu ta estrictamente prohibi pa retira nan. Yerba di caña mester keda realoca temporalmente bao supervision di DNM si ta necesario. Si no cumpli cu e condicionnan specifica den e permiso aki, ta bay considera como cu e desaroyador a actua sin permiso.

Tambe ta indica cu minister por otorga un ontheffing riba un prohibicion manera referi den Articulonan 5, 6(2) y 7(2) y (3) segun reglanan estableci pa un decreto nacional conteniendo medidanan general. Lo consulta autoridad cientifico inmediatamente riba cada solicitud cu ta ricibi pa un ontheffing. Por otorga un ontheffing cu restriccion of por mara condicion na esaki y tambe por haci amienda na esaki na cualkier momento.

Richard H.R. Gibbs, nombra como inspector bao decreto nacional y emplea na Departamento di Naturalesa, a reporta cu dia 23 di juni ultimo, bao solicitud di Sr. Gisbert Boekhoudt, director di Departamento di Naturalesa, a haci un inspeccion pa cumplimento cu Ordenansa di Proteccion di Naturalesa cerca di Embassy Suites. Eynan nan a observa cu Varadero, hunto cu Atco, tabata plamando santo pa e construccion y expansion di e beach ubica west di Embassy Suites.

El a bisa cu nan a observa un digger retirando yerba di caña y poniendo esaki riba un raft. Subsecuentemente empleadonan di Varadero a move esaki como 50 meter for di costa y a bash’e back den lama.

Nan a puntra e project manager si e tin un ontheffing segun Natuurbeschermingverordening pa retira e flora nativo protegi, esta e yerba di caña. El a contesta cu no mester di esaki ya cu nan tin tur permiso caba.

Den e disputa cu ABC, a solicita pa corte provisionalmente prohibi Natura di ehecuta cualkier actividad di construccion di beach den e area pa cual tin permiso di construccion sin cu tin e ontheffing en cuestion.

E veredicto
 Corte, dunando veredicto den procedura sumario, a prohibi Natura di ehecuta cualkier actividad di construccion di beach (incluyendo bulldoze, demolicion y construccion) den e area pa cual a ricibi un permiso di construccion sin cu a obtene e ontheffing referi den Articulo 8 di Natuurbeschermingverordening pa eliminacion di yerba di lama (e eliminacion di e yerba for di su ubicacion actual) y e prohibicion aki ta keda na vigor te cu dicidi otro den un caso substantivo.

Tambe ta determina cu Natura ta suheto na un multa di un miyon florin pa luna of parti di esaki cu viola e prohibicion menciona, te un maximo di 25 miyon florin, cu mester paga na ABC.

Tambe ta duna orden na Natura pa paga e gastonan di e procedura legal incuri pa ABC, cual ta fiho na Afl. 2,400 te cu e veredicto. Ta declara e veredicto enforsable provisionalmente, y ta rechasa cualkier otro solicitud adicioonal of diferente haci pa ABC.

E veredicto a keda pronuncia pa hues A.H.M. van de Leur, y a ser duna durante un audiencia publico den corte diaranson ultimo.