Den veredicto duna ayera, hues mr. A.J.h. van Suilen, den casonan di funcionario publico, a ordena ministro encarga cu salubridad publico pa inmediatamente permiti Jerry Staring reasumi su responsabilidadnan como director di e departamento di Salubridad Publico.

A base di articulo 94, inciso 4 di Landsverordening ambtenarenrechtspraak no tin posibilidad di apelacion riba e veredicto aki. Por lo tanto, no tin otro manera di actua cu efectua e orden di hues y permiti Staring reanuda trabao.

Staring, representa pa abogadonan mr. D. Kock y mr. E. Cafarzuza, (ministro tabata representa pa mr. C. Coffie) a pidi corte un decision a base di su obhecion contra e di tres biaha cu e mandatario a haci uso di articulo 52 di LMA pa ordena Staring eherce otro trabao na lugar di e tareanan relaciona cu su funcion como director di e departamento menciona, pa un periodo di 12 siman. Anteriormente, Staring a apela infructuosamente e orden cu el a haya di e mandatario pa haci otro tareanan, como ‘beleidsadviseur/beleidsmedewerker’, loke a conduci cu durante tres periodo di 12 siman, e tabata obliga di haci esaki riba veredicto di hues, cu a haya esaki admisibel.

Sin embargo, den e di tres caso di extension aki, hues a considera cu e ministro no por keda haci uso di e articulo menciona, ya cu ta trata di un medida di caracter temporal, y a haya cu mester pone un fin na e situacion aki.

Den e consideracion di hues Van Suilen a hunga un papel tambe cu, mientras tanto tabatin amplio tempo pa caba cu e investigacion cu Departamento di Recurso Humano (DRH) a ehecuta encuanto e funcionamento di Staring, y dia 12 di april 2019 DRH lo a duna un conseho encuanto e posicion huridico di e director. A base di esey lo mester ta logico cu proximamente e mandatario concerni lo mester tuma un decision kico ta bay haci. Den corte a trece dilanti cu DRH den su conseho lo a constata e ineptitud di e persona pa eherce e funcion.

Na nomber di e mandatario, su abogado a trece dilanti cu su cliente tin intencion di sigui e conseho di DRH, pa loke ta yama Staring pa duna cuenta di su ‘plichtsverzuim’ y tambe encuanto su destitucion di e funcion (di director) y su ‘overplaatsing’. Abogado di e mandatario tabata desea ainda un extension mas di 12 siman, pasobra e mandatario lo mester busca un funcion adecua pa Staring, manera hues ta formula esaki den su veredicto. Tambe a argumenta cu un regreso na e momento aki di e persona lo ta ‘funesto’ (fatal) pa e trankilidad actual dentro di e departamento concerni.

A pesar di e obhecionnan treci dilanti, hues a haya cu un extension mas no ta na su lugar, ya cu un extension mas ta haci Staring sinti su mes poni riba un ‘zijspoor’ cu posible consecuencia pa su carera den futuro, y cu por ta perhudicial tambe pa su satisfaccion laboral. Tambe hues ta constata cu e investigacion contra su persona ta cla, y cu e management team a haya oportunidad pa caba cu e investigacion den ausencia di su persona. Tambe hues a considera cu den e ultimo veredicto di 4 di februari 2019, contra e anterior extension di 12 siman, hues e tempo ey a considera cu e mandatario mester tuma pasonan concreto encuanto e posicion di e peticionario, pa evita un di tres extension. A pesar di esey, e mandatario a dicidi toch pa extende un biaha mas cu 12 siman.

Hues ta cosidera por lo tanto cu e ultimo extension di e periodo como ilegitimo. No tin un interes urgente pa mantene e director aleha di su tareanan regular mas. Tambe hues ta considera cu mester duda seriamente si den e ‘bodemprocedure’ e decision disputa lo por prevalece, y ta dicidi di honra e peticion di e director, ordenando su regreso inmediato na trabao, den su funcion di director di DVG.

No ta conoci ainda kico lo ta e proximo pasonan di e mandatario. En todo caso, en bista cu e rapport di e investigacion di funcionamento di e director ta cla, mas di un luna caba, probablemente por tin un decision desfaborable atrobe pa e director, manera practicamente ya a anuncia durante tratamento di e caso aki. Lo no ta ultimo biaha cu e partidonan ta topa den corte.