E hues di Caleta Olivia, a cargo di e investigacion di e desaparicion di e submarino ARA San Juan, Marta Yañez, a cita como testigo e ministro di Defensa, Oscar Aguad. Caleta Olivia ta un ciudad na Patagonia Argentino, segundo ciudad di provincia di Santa Cruz, na region di Golfo San Jorge.
Segun cu fuentanan oficial hudicial a splica na Infobae, e magistrado a manda e funcionario un cuestionario diabierna pasa, pa e declara. A usa e modalidad aki pasobra, den su calidad di ministro, Aguad tin e facultad di declara por escrito. Di tur manera, Yañez a dun’e e opcion di presenta en persona na Caleta Olivia.
E parti mas destaca di e texto hudicial ta cu e ta pidi e hefe di e cartera di Defensa pa releva e secreto pa e hefenan di Armada di Argentina y pa henter e documentacion cu ta concerni e submarino.
Tambe, gran parti di e preguntanan ta referi na e comunicacion di e embarcacion cu e base y toren di control. E hues a pidi e ministro di responde via e cuestionario mas pronto posible y segun informacion di e portal Infobae, ministro Aguad ya a contesta. Fuentenan oficial a indica cu den seno di gobierno nan a ricibi e noticia cu sorpresa.
ARA San Juan, submarino di armada Argentino, cu tabata carga 44 tripulante a bordo, a perde contacto cu e base dia 15 di november pasa, ora e tabata bolbe di Ushuaia den direccion di Mar del Plata. 13 dia despues no tin novedad encuanto e paradero di e barco.
“Lamentablemente nos no a haya ainda ningun localisacion di e submarino,” asina ayera Enrique Balbi, vocero di Armada, a bisa, y a admiti cu na e altura aki di e buskeda “e situacion ta extremo.”
