(AP) – Un hues federal a ordena Apple pa desmantela un parti lucrativo di e baricada competitivo cu ta proteha e tienda di aplicacion di Apple yama App Store, pero a rechasa acusacionnan cu e compania ta manehando un monopolio ilegal cu ta interumpi competencia y innovacion.

E declaracion riba diabierna ta sigui ataca e supuesto “walled garden” cu Apple a construi alrededor di nan producto popular, e iPhone y su app store, sin cu esaki kibra completamente.

E decision di 185 pagina di hues di distrito di Merca yama Judge Yvonne Gonzalez Rogers tambe a provee Apple avlivio y victoria. E hues no a marca Apple como un compania monopolista ni a haci un rekisito cu nan mester permiti e competencia ofrece aplicacionnan pa iPhone, iPad y iPod.

Esaki tabata dos di e obhetivonan mas grandi cu Epic Games, e trahado di e wega popular Fortnite a demanda, cu nan a spera lo ta e comienso di un caso anti-confiansa cu a ser habri aña pasa, despues di cu hopi balentia nan desafia un sistema di pago exclusivo cu ta otorga 15% pa 30% di tur transaccion digital haci den e iPhone na Apple.

E transaccionnan aki por inclui varios diferente topico, di Netflix pa Spotify, na e benta di productonan digital manera cantica, pelicula of paketenan virtual pa cumpra cu ta añadi na e weganan. Epic a trece dilanti cu e tarifa aki ta asina halto como tactica cu no lo ta posibel si e otro tiendanan di competencia por a ofrece iPhone aplicacion.

Mientras cu otro partinan di su decision a trece cierto preguntanan encuanto e tarifanan aki, y si Apple tabata subiendo e prijsnan aki pa consumidor, Gonzalez Rogers a laga e structura di e tarifa intacto y a mantene e compania su derecho di blokia otro companianan di ofrece aplicacion na su iPhone. El a tuma parti di Apple den tur otro punto clave di e caso.

Pero e hues si a conclui cu Apple tabata participante den competencia inhusto bao di California su ley, causando cu el a ordena e compania pa permiti e personanan cu ta desaroya e aplicacion den henter Merca di añadi otro opcionnan di pago ademas di esun dentro di iPhone su aplicacion. E cambio aki ta haci hopi mas facil pa e trahado di e aplicacion evita di tin cu paga Apple comision, potencialmente afectando biyones di dollar den ganashi anual.

E prospecto di Apple ricibiendo un golpi di e magnitud aki na su margen di ganashi a preocupa inversornan, causando e prijs di bienes den e compania baha cu 3% den diabierna su bolsa di balor. E cambio aki a causa un daño di 80 biyon dollar na Apple su balor di mercado.

Sinembargo, Apple a haci su mayor esfuerso pa ilustra e decision aki como un victoria completo, aunke nan a admiti cu posiblemente nan lo apela parti di e declaracion, cu lo haci mas facil pa e trahadonan di aplicacion evita Apple su comision.

“Nos ta hopi contento cu e decision di corte y nos ta considera esaki un victoria pa Apple,” segun Kate Adams, e compania su consehero general. “E decision aki ta valida cu Apple ‘su exito no ta ilegal,’ manera e hues a bisa.”

Gonzalez Rogers tambe a dal un golpi na Epic ora cu a declara cu e trahado di wega a kibra contract cu Apple ora cu Fortnite a agrega un opcion di pago fuera di Apple su sistema den e aplicacion. E acto aki a causa cu Apple a kita Fortnite di su app store 13 luna pasa, cual ta loke a causa e demanda di Epic. El a ordena Epic Games paga Apple casi 3.7 miyon dollar, of 30% i e ganashi cu nan a genera mientras nan a viola Apple su regla di comision.

Epic su CEO Tim Sweeney a critica e declaracion di e hues riba su cuenta di red social Twitter bisando cu e “no ta un victoria pa trahadonan di wega, ni tampoco pa e consumidor.”

El a bisa cu Fortnite lo bolbe bek Apple su app store na momento cu nan por ofrece pago den e aplicacion competitivo, “nos lo sigui lucha,” el a agrega den un otro publicacion.

“E ta un poco di un mescla,” segun profesor di ley Mark Lemley di Stanford University. “Mi ta kere cu ora pone eskai den balansa, Apple a evita e menasa mas grandi contra di nan.”

E declaracion ta pone fin na un huicio cu a asa henter e luna di mei enfoca riba Apple su app store, un di e pilarnan cu ta sostene e empresa di 2 triyon dollar.

Desde cu e huicio a caba, Apple a tuma dos paso pa alivia algun di nan regla pa cu e app store, un di aregla un demanda y e otro di acerca reguladornan Hapones sin altera nan comision. E cambionan aki ta haci hopi mas facil pa varios aplicacion motiva nan usuario pa paga e transacionnan digital aki den maneranan cu ta evita di pasa door di Apple su tarifanan.

Como parti di e trato cu reguladornan Hapones anuncia siman pasa, Apple a bay di acuerdo di permiti loke nan ta yama aplicacion “reader”, cual ta e aplicacionnan cu ta bende subscripcion na musica digital, videonan y publicacionnan, pa hinca link den e aplicacion cu ta manda e usuario na otro sitio web unda cu nan por crea nan cuenta, y den teoria, paga pa e servicio fuera di Apple su aplicacion.

Aworaki, Gonzalez Rogers ta ordenando Apple pa permiti e linknan aki di manera di pago fuera di Apple directamente den e aplicacionnan, algo cu Apple a keda resisti te cu awo.

“E modificacion di e restriccionnan aki lo aumenta competencia,” Gonzalez Rogers a skibi. Por ehempel, e lo expone Apple na servicionan di pago cu ta pidi un comision hopi mas abao.

Otro compania den contra di Apple ta Spotify, nan a elogia e declaracion cual ta provee e consumidornan cu otro opcionnan di pago.

E compania, cual ta entre e criticonan mas grandi di Apple su sistema di comision, a haci un yamada na abogadonan y reguladornan pa sigui cu e trabao di baha mas di e murayanan cu ta proteha Apple su app store.