(DW) – Un hues di corte supremo di Brazil a ordena e multimiyonario Elon Musk diaranson ultimo pa nombra un representante nobo di su red social X den un tempo di 24 ora sino e plataforma ta bay keda suspendi den e pais.

Alexandre de Moraes, hues di Corte Federal Supremo (STF), a pidi Musk pa indica “den 24 ora e nomber y cualificacion di e representante legal nobo di X na Brazil.”

E decision a ser publica riba e cuenta di STF riba e red social mes, ex-Twitter, unda a tag Musk y e usuarionan di e compania.

Falta di cumplimento lo conduci na e “suspension inmediato di e actividadnan di e red social” den e pais mas grandi di Latino America, el a agrega.

E hashtag “O TWITTER MORREU” (“Twitter a muri”) a bira viral lihe riba X.

Musk, tambe fundado di Tesla y SpaceX, a acusa Moraes dia 19 di augustus, kende el a yama un “dictador” di a menasa su empleadonan cu prison, y a anuncia ciere inmediato di e operacionnan di X na Brazil.

Despues e compania a bisa cu e ta cera su operacionnan na Brazil debi na e accionnan di e hues pero a mantene e servicio disponibel pa e Brasileñonan.

E gobierno di presidente iskierdista Luiz Inacio Lula da Silva a critica e decision di X.

Den e ultimo añanan e compania tabatin un desacuerdo cu e Corte Supremo di Brazil.

Moraes a ordena pa blokia e cuentanan di figuranan influyente di e movementonan ultraconservador Brasileño, principalmente desde e intentonan di partidarionan di e ex-presidente di extrema derecha Jair Bolsonaro, un admirador di Musk, pa desacredita e sistema di votacion electronico durante e eleccion presidencial gana pa Lula.

E decision di Moraes ta destina pa sigura cu e plataforma ta respeta e ley Brasileño, cu ta exigi representacion den e pais, e corte a bisa den e publicacion di diaranson.

Na april, X a admiti cu usuarionan di varios cuenta blokia a logra evita e restriccionnan. Musk ta acusa Moraes di kier “censura” e plataforma.

E magnate tambe ta e tema di un investigacion di e sistema di husticia Brasileño contra “milicia digital”, cu ta mustra riba e supuesto uso ilegal di recursonan publico door di Bolsonaro y su circulo interno pa orkesta campaña di desinformasion riba internet durante su presidencia (2019-2022 ).