Na comienso di februari, sindicatonan SIMAR (Sindicato di Maestro di Aruba) y SEPPA (Sindicato Empleado Publico y Priva Aruba) a ricibi di hues un ordemaatregel pa stop tur accion di protesta relaciona cu e reduccion di 12.6% di salario, te ora cu bin cu un caso sumario. Ayera veredicto den e caso aki a keda conoci, y ta uno preliminar.

Riba su pagina di Facebook, SEPPA a skirbi:

“Ya dia 11 di februari cu e caso a tuma lugar, nos a informa cu SEPPA ta premira cu dia 2 di maart 2022 hues lo no dicta algo concreto como solucion definitivo pa e hecho cu ta kita placa di trahador y obliga trahador traha 100%, sino lo bay duna un ‘tussenvonnis’. Pues SEPPA no a spera cu e solucion ta awe di biaha.”

Ademas, SEPPA a conta cu ‘hues di comienso a bisa cu e ta pensando pa pidi gobierno pa bin cu un proposicion structural y nada temporal’. “Cu esaki el a tira tur cos back den direccion di Gobierno di Aruba y pa no bin ‘solamente’ na Corte pa prohibi trahadornan di tuma cualkier accion, sino bin tambe cu loke por soluciona e problema of kita e inhusticia cu ta kita placa di trahadornan, of cu trahadornan ta wordo spera pa traha 100% mientras cu no ta paga trahadornan 100%.”

Algo cu a destaca den e tussenvonnis ta cu inicialmente a menciona un periodo di dos luna, pero awo hues a duna apenas dos siman. “Cu esaki nos por bisa cu hues a tuma na consideracion e puntonan cu SEPPA a bin cune, cual tambe ta desbarata e ponencia di gobierno cu ta di un dia pa otro a bin cu e accionnan. Hues na ningun forma a duna rason na gobierno cu loke ta pasando ya 2 aña caba, esta ta kita placa di trahadornan di gobierno, di fundacionnan y NVnan, y cu mester keda haci esaki of no ta bisa e trahador ki dia ta stop cu esaki. E meta pa cual a haci esaki NO ta existi mas! No tin loonsubsidie, no tin FASE y tampoco tin ayudo humanitario mas. Pues ta incomprendible dicon gobierno ta keda kita placa, cual contrario na e meta stipula den ley cu ta sostene e medida aki, ya no ta existi mas. Cu esaki caba nos ta wak cu mas bien trahadornan den lucha tin motibo pa haci loke nan ta haciendo, esta protesta y exigi cu si nan no ta wordo paga 100% nan no por wordo obliga pa traha 100% tampoco”, e sindicato a splica.

Pa finalisa, SEPPA a indica di mira e tussenvonnis aki como un desaroyo positivo. “Nos ta mira e resultado di e caso aki positivo, ya cu hues ta wak e dolor di trahadornan y cu henter e asunto aki di ‘mishi’ den cartera di trahadornan ta di mas. Ta p’esey hues ta pidi gobierno di Aruba pa dentro di dos siman (dia 16 di maart 2022) indica cua ta e posible alternativanan cu ta wordo ofreci cu ta ‘reemplasa’ e kitamento di e placa di trahadornan. Esaki sin ningun forma di uitstel of retraso! Despues di esaki, SEPPA mester duna su contra-reaccion. SEPPA ta keda para riba cu mester stop cu kitamento di placa di trahador y mientras cu esaki no sucede, e principio ‘no pay no work’ ta conta.”

Reaccion SIMAR
Di su banda, SIMAR a bisa Bon Dia Aruba cu nan a haya e veredicto, y cu a reuni bestuur pa asina bespreek pa bin dilanti cu un punto. A tuma nota di e tres punto, uno ta cu gobierno mester bin cu plan structural pa baha gasto. Josephine Albertus di SIMAR a bisa cu e hecho cu a pone apenas dos siman tempo ta mustra cu ‘ta poniendo presion tambe di parti di corte’. “Ora nos haya dia 16 e plan, nos como SIMAR lo tin dos siman pa tuma nota di e plan, evalua y bin cu nos feedback. Y nos por bisa e ora ey tambe nos a palabra cu nos abogado cu e momento ey nos lo sinta cune. Y si mester tambe, nos lo bay back na e veld, pasobra nos ta vocifera e preocupacionnan di veld. Y ora despues nos lo tin cu warda riba e vonnis definitivo di hues.”

Pa finalisa, Albertus a bisa cu nan ta ‘contento y positivo cu e clase trahador ta hayando oido pa e preocupacion y e frustracion cu ya caba tin dos aña ta andando. Y nos lo spera wak kico hues lo bin cune den e vonnis definitivo’.