Diabierna 2 di december hues ta tuma decision pa kita e prohibicion di bandona Aruba cu Sr. Daniel Orozco tabatin.
Den cuadro cu e caso cu a wordo lanta contra Gobierno di Aruba pa kita e prohibicion pa representante di e compania Señor Frogs bandona e isla, corte a dicta diabierna den su sentencia cu e por bandona Aruba. Hues a dicta cu Daniel Orozco como empleado di un compania di exterior no por wordo teni responsabel manera director di compania Jobem. E prohibicion di biaha ta bin for di departamento di Belasting, anto su abogado Joselin Croes ta defende cu su cliente ta simplemente un trahado di e compania di afo cu a bin cumpli cu su parti. Empleadonan di Señor Frogs ta sperando ainda cu e director ta na caminda manera cu a wordo anteriormente informa, anto no kier a duna Bon Dia Aruba un reaccion ainda riba e ultimo desaroyonan aki.
Reaccion di Sra. Ramos
Sra. Ramos ta informa Bon dia Aruba cu awe ta un dia tristo pa empleadonan di Señor Frogs, ya cu hues a tuma decision pa kita e prohibicion di vuelo di Orozco. Sra. Ramos ta indica cu e decision di hues, ta duna e empleado nan un sentimento di insiguridad mirando cu nan no sa kico ta bay pasa awo. Segun Sra. Ramos abogado Croes cu ta representa Orozco ta bisa cu su cliente no ta responsabel mirando cu e tabata simplemente cumpliendo cu ordo cu a wordo duna na su persona. Y e persona responsabel ta Sr. Omar Lincon Schmid cual supuestamente ta na caminda pa Aruba, pero no a yega ainda.
