Hues ta dicta 3 aña di castigo pa homber cu a abusa menor di 15 aña

Hues ta sentencia Rafael Dos Santos – miho conoci como e homber pedofiel cu a ser gara sunu den auto cu menor di edad – pa 42 luna (3.5 aña) di castigo.  Esaki pues ta e sospechoso cu polis a detene aña pasa na Piedra Plat acusa di abusa sexualmente di un menor di 15 aña.

Ministerio Publico pa medio di un comunicado ta informa cu hues a mustra prueba cu tabata tin intento di violacion y relacion sexual cu un mucha muhe di 15 aña di edad.  Rafael Dos Santos tabata un conoci di e victima cu ta su yiu di criansa. Segun corte,  e victima a ser saca prome cu tempo for di e man di e sospechoso kende tabata preparando pa viol’e den su auto. E sospechoso a purba di huy for di polis ora cu polis a yega.

Caso
Dialuna anochi 10 di October 2016, patruya di St. Cruz a tuma nota di un auto bahando e cero na Seroe Cristal cu no kier a para pa Polis ora a dun’e señal. A inicia un persecucion pidiendo pa mas Polis anto logra para e vehiculo den cura di Veld di Britania na Piedra Plat. Akinan Polis a blokia e vehiculo anto bay na e auto topa cu un homber sunu y un mucha menor di edad cu tabata tur spanta. A notifica recherche di e caso aki dibiaha anto e homber a keda deteni. Segun e sentencia, hues a considera esaki como momentonan di hopi angustia pa e victima como tambe un caso cu a causa hopi polemica den pueblo.

No ta prome biaha
Rafael Dos Santos a yega di haci su mes culpabel na actonan di violacion cu e mesun mucha muhe aki tempo cu e tabata tin 13 aña di edad. E sospechoso a seriamente viola integridad fisico di e victima abusando di e confiansa cu e victima a pone den dje segun declaracion di hues. Considerando edad di e victima, ambos biaha e tabata den un posicion vunerabel. Hues den su condena a tene cuenta cu e sospechoso no tin un antecedente penal. A pisa tambe cu despues di e detencion di e sospechoso cu el a ser exponi publicamente den prensa. E psicologo cu a atende cu e persona a raporta cu e sospechoso no por rasona. Esaki hues no a considera den su condena. Pruebanan cu a ser haci a resulta cu e persona falta di desaroyo mental pero esaki no ta influencia e comportacion di dje cu lo a impedi su actuacion. E castigo pues ta conforme cu exigencia di fiscal. Riba rednan social e comentarionan no ta mucho positivo: varios ciudadano ta disgusta cu e sospechoso a haya asina tiki castigo.

Akinan por mira un reportahe di video cu Bon Dia Aruba a haci relaciona cu e tema algun luna atras.