(AP) – Un muhe di Alabama cu acusa Jay-Z y Sean ‘Diddy’ Combs di violacion ora cu e tabatin 13 aña por sigui anonimamente, pa awo, den su demanda contra e magnatenan di rap segun decision di hues.
Den su ordo por escrito, Hues Analisa Torres tambe a zundra e abogado cu ta representando Jay-Z pa loke e ta describi como su mocionnan cu intencion di combate y “lenguahe inflamatorio” contra e victima su abogado, yamando nan inapropia.
E hurista di Manhattan a bisa cu e muhe por sigui di manera anonimo den e etapa trempan di e caso, sinembargo ta posibel pa rekeri cu e mester revela su identidad mas adelante, si e caso sigui cana. Esaki lo permiti e abogadonan di defensa colecta e evidencia necesario pa prepara pa e huicio. Torres tambe a cinta “interes substancial” di e publico.
Combs ta keda deteni na New York wardando un huicio criminal pa cargonan di trafico sexual federal. Tambe e ta enfrenta un ola di demandanan di agresion sexual, varios cual a ser entrega pa e victima su abogado, Tony Buzbee, un abogado di Texas ken su firma ta representa mas di 150 persona, ambos hende homber y hende muhe, ken ta alega abuso sexual y explotacion di parti di Combs.
E demandanan ta acusa cu varios individuo a ser abusa na fiestanan cu a tuma luga na New York, California y Flroida despues di a ricibi bebidanan intoxica cu droga.
Combs su abogadonan a desmenti Buzbee su demandanan y categorisa nan como “publicidad sin berguensa, diseña pa saca placa for di celebridadnan cu tin miedo cu mentira lo plama tocante nan, di mesun manera cu mentira a plama tocante Mr.Combs.” Jay-Z a bisa den un declaracion cu Buzbee ta purbando di blackmail su persona pa yega un areglo den e caso di e muhe di Alabama.
Buzbee a bisa den un email cu su firma no ta duna comentario riba decisionnan di corte.
Den su demanda, e muhe cu a acusa e violacion ta identifica su mes como “Jane Doe.” El a bisa cu e tabata bibando na Rochester den aña 2000 ora cu el a yega New York City y a cera un amistad cu chauffeur di limousine cu a hiba su persona na e after-party di MTV Music Awards, unda e ta bisa eventualmente el a ser ataca pa Jay-Z y Combs.
Alex Spiro, un abogado di Jay-Z, a pidi hues pa retira e cantante for di e muhe su demanda y a pidi un audiencia pa e caso e dia despues cu el a entrega su peticion por escrito. El a cita un entrevista di e victima, unda algun inconsistencia a ser nota. Pa cu esaki, e muhe en cuestion anteriormente a admiti cu tin inconsistencia den su declaracion.
Torres a skirbi den su ordo diahuebs cu Spiro, ken tabatin menos di 3 siman riba e caso, a entrega un “litania di carta y mocion purbando di impugna e caracter di e victima su abogado, varios di nan exponiendo e supuesto ‘urgencia’ di e caso aki.”
Referiendo na Jay-Z pa su fam legal, e hues a agrega cu: “Carter su abogado su entrega di mocionnan cu ta contene lenguahe inapropia y atakenan ad hominem ta inapropia, un perdida di recursonan hudicial y un tactica cu ta tiki probabel di yuda su cliente. Corte no lo apresura e proceso hudicial solamente pasobra un abogado a exigi esaki.”
