(AP) – Hues di Los Angeles a dicta dialuna cu tin suficiente evidencia pa A$AP Rocky mester presenta na corte pa tin un huicio a causa di e acusacionnan cu el a los tiro contra un ex amigo y colaborador riba caya di un hotal na Hollywood den aña 2021.
Hues di Corte Superior M.L Villar a duna e veredicto na un audiencia preliminar, despues di tende por lo menos un dia y mei di testimonio di dos testigo. Rocky, ken no a duna reaccion visibel na e decision, a declara su mes inocente pa cu e acusacion di asalto cu un arma semiautomatico. E rapper di 35 aña, fashionista y nominado di 2 Grammy ta den un relacion cu Rihanna, cu ken e tin 2 yiu homber chikito. E lo pro ricibi un sentencia di 24 aña den prizon si declara su persona culpabel den tur acusacion, e fiscalnan a informa.
Villar a bisa cu “e totalidad di e video y testimonio” ta mustra cu tin suficiente evidencia pa e acusado por bay huicio. El a enfatisa cu e audiencianan preliminar tin un standard hopi mas abao pa cu evidencia compara cu un huicio.
“Nos no ta desapunta y nos no ta sorprendi, nos a premira cu nos lo bay huicio, nos tabata preparando pa e huicio henter e tempo aki,” Rocky su abogado Joe Tacopina a bisa pafo di corte. “Rocky lo ser libera di tur acusacion ora cu nos caba cu e huicio, esaki ta sin duda.”
Na e prome dia di e audiencia, cual a caba dialuna despues di un atraso largo, Terell Ephron a testigua cu su persona y Rocky, un amigo desde nan infancia, tabata forma parti di e mesun colectivo di musico y artista na New York High School. El a bisa cu nan relacion a cuminsa bira malo y a resulta den un confrontacion na Hollywood dia 6 di november na aña 2021, ora cu aparentemente Rocky a saca un arma riba su persona y den un confrontacion despues a los tiro cu a touch Ephron su knuckle. “Bo no tin mester di nada mas cu Mr. Ephron su testimonio,” District Deputy Attorney Paul Przelomiec a conta e hues prome cu su decision, agregando cu e video di camara di siguridad a captura partinan di e incidente cu ta “comproba exactamente loke Mr. Ephron a bisa.”
