Diamars pa 4’or dia tardi, pa mas o menos mey ora hues a lesa ampliamente e sentencia duna den e caso di Ministerio Publico contra acusado Anderson Rasmijn den caso di asesinato di Poentje Castro. Anderson Rasmijn a wordo declara liber di acusacionnan principal cu tabata ta asesinato pre-medita.

Awe tardi sinta na KIA, e acusado a scucha cu no tin ningun prueba contra di dje. OM no a logra prueba cu el a mata Poentje Castro. Cu e tabata na sitio ta berdad, pero no tin prueba fuerte cu el a yega full na e cas, ademas el a duna un declaracion unda a hustifica pa kico e tabata den e area y no por a presenta ningun motibo pa por a asesina Poentje Castro.

Abogado Vito Carlo cu a representa Anderson Rasmijn ta bisa cu fiscal a uza su defensa como ‘blueprint’ pa traha riba e sentencia, bayendo riba cada punto pa mustra cu eigenlijk Ministerio Publico no tabata tin un caso fuerte pa declara su cliente culpabel pa e hechonan cu nan ta kere su cliente a haci. “Dus hues na final a sigui mi defensa y declar’e completamente liber,” sr. Carlo ta expresa.

Un punto hopi importante tabata orario di e video na unda cu na dado momento e team di investigacion ta bisa cu e video ta cana 8 minuut adelanta pero no tin ningun prueba cu ta berdad e ta asina. Si bay tuma e orario di e video original, na momento cu sr. Castro a manda su delaster mensahe via Blackberry cu e ta na bida, e cliente di sr. Carlo tabata den auto caba. Otro punto ta cu descrepancia di orario cu hende a scucha tiro, y tambe cu hopi testigo ta menciona cu a wak of scucha un of dos hende riba scooter den e vecindario na ora cu a scucha tiro. Sr. Carlo como abogado ta spera cu e caso no wordo apela pa hinca su cliente den henter un trayecto atrobe di tratamento un caso cu un Dossier cu no ta apto pa bay persigui su cliente cu ne. “Pero ja, esaki ta decision cu fiscal mester tuma. Ta nan ta haci nan midimento y ta spera cu ta fabor di mi cliente y respeta decision di hues y lag’e pa loke e ta, vooral tambe pa e famianan,” segun sr. Carlo.

Ministerio Publico: “Lo studia e sentencia pa tuma decision si ta apela”

Fiscal cu a trata e caso aki a haya legalmente proba cu e acusado lo tabata tin sospecho di asesinato pre-medita, pero hues tabata di otro opinion. Awor ta na OM pa studia sentencia di hues bon prome y pa despues tuma decision si ta apela of no. OM tin 14 dia pa apela, y awor ta na nan pa studia esaki bon prome, mester sinta internamente hunto pa tuma e decision aki, “muy probablemente mi por bisa cu nos lo apela,” fiscal Jolanda Pronk a declara ayera atardi despues di e caso.