Otro intento fayido pa R. Kelly, un hues a rechasa su segundo intento pa wordo libera di prison pa motibo di pandemia di coronavirus.
E hues federal a reconoce cu e malesa a plama na MCC Chicago, unda Kelly ta deteni wardando su prome di varios huicio. Sinembargo, e hues a bisa cu e mocion pa libertad di Kelly bou fiansa no a presenta suficiente evidencia cu e cantante ta particularmente den riesgo di contrae coronaviurs.
En cuanto e argumento di Kelly cu no tin riesgo cu e lo huy pasobra anteriormente el a presenta pa audiencianan programa den corte, e hues no tabata convenci. El a bisa cu Kelly awo ta enfrentando cargonan mas serio, incluyendo manipulacion di testigo, pues atrobe, no lo haya libertad.
Manera Bon Dia Aruba a publica, abogado di Kelly a bisa hues cu e cantante ta den un posicion vulnerabel na MCC Chicago, specialmente despues cu un detenido den piso di Kelly recientemente a ser hospitalisa pa COVID-19. Tambe a insisti cu no tin riesgo cu Kelly lo huy pasobra e cantante realmente no tin manera. Nan a resalta cu Kelly ta debe casi $2 miyon den impuesto, y cualkier placa cu e gana di derechonan di autor ta bay pa paga su cuentanan.
Decision di e hues no a haci referencia na su problemanan financiero, pero si a comenta riba insistencia di Kelly cu e lo keda trankil – bistiendo un monitor GPS – y keda leu di rednan social. E hues a bisa cu pa motibo di pandemia y recursonan di cumplimento di ley bou presion, ‘nan no por sigura cu un acusado cu un historia, incentivo y oportunidad pa interferi cu posibel testigonan no lo haci esey’.
Prome intento di Kelly pa keda den libertad a ser rechasa. E tempo ey, e hues a bisa cu no tin miedo cu e cantante lo contrae e virus pasobra no tabatin caso confirma na MCC Chicago. E parti ey a cambia, pero e resultado pa Kelly a keda mescos.
