Pa di tantisimo biaha den e ultimo lunanan un hues ta condena gobierno, y specificamente e ministro encarga cu Infrastructura den un caso unda ta duna mal ehemplo violando ley cu nan no kier tuma na cuenta. Ademas den e caso di e siman aki hues ta condena e actitud di gobierno pasobra ta nenga di asumi e papel cu tin como autoridad cu mester vigila cumplimento di ley di otronan.
E caso en cuestion ta esun cu Aruba Birdlife Conservation (ABC) a entama den corte, pa para e proceso cu por lo bisto tabata andando riba e tereno dilanti Divi Phoenix, unda a laga rosa esaki en espera di un permiso di erfpacht. A bay asina leu tambe cu a cera e tereno cu tabla pa impedi entrada di otro persona. Tur esaki cu consentimento di e autoridadnan concerni, pa cual ministro di Infrastructura ta responsabel.
Hues tabata hopi fuerte (atrobe) den su expresion contra gobierno, constatando cu no ta cumpliendo cu ley, den e caso aki e Ordenanza di Ordenamento Teritorial, bao di cual a yega na establece un ‘Ruimtelijk Onwikkelings Plan’, cu ta stipula pa 10 aña e uzo cu por duna e tereno ey y cual no. E tereno en cuestion, cu ta forma parti di e zona di reserva di e plas di Bubali, ta defini den e plan como area berde te aña 2019. Hues a honra punto di bista di ABC cu no ta posibel emiti tereno den un zona defini como area berde pa otro uzo, den e caso aki pa desaroya e area pa actividad hotelero.
Hues a keda impresiona cu gobierno tabatin e pudor pa trece dilanti argumento cinico cu e tereno no tin balor mas como santuario pa parha, pasobra nan no t’ey mas… El a referi na esaki den su veredicto:”Tumando na cuenta e actividadnan dirigi aparentemente na prepara e terenonan pa construccion, cu a tuma luga recientemente riba e parcelanan 4314 y 4315, ademas e anuncio den corte di banda di e Pais (Aruba) cu apesar cu e derecho di opcion a caduca, ainda ta existi e disposicion pa emiti e terenonan como erfpacht na e desaroyadornan di proyecto, ABC tin suficiente interes urgente cu su demanda dirigi na proteccion di e balornan natural presente ainda riba e parcelanan concerni. Corte den esaki ta ignora e ponencia treci sin ningun fundamento den corte di banda di e Pais, cu pa motibo di e secura continuo di ultimo lunanan e parhanan a bandona e tereno concerni, pa cual esaki lo a perde su caracter di habitat importante pa parha.” Como gobierno bo mester tin basta curashi pa laga abogado papia semehante disparate dilanti hues, anto como gobierno den nomber di nos tur…
En todo caso, corte a dicta sentencia completamente na fabor di fundacion ABC, prohibiendo gobierno pa emiti e terenonan concerni como erfpacht o cualkier otro forma pa actividad cu no ta cuadra cu e ROP actual. Tambe hues a ordena gobierno, bao penalisacion cu un suma di Afl. 250.000 pa cada dia o parti di dia cu gobierno faya pa sigui e orden aki, ‘pa actua contra cualkier actividad riba e parcelanan menciona cu por significa un deterioro mas grandi di e destino como area berde duna den e ROP.’ Esaki concretamente ta bisa cu gobierno di su banda mester haci tur cos pa promove e destino como area berde, y actua contra tur cos of esnan cu ta atenta contra e destino aki. Poco biaha nos ta mira caso den corte unda hues ta tuma posicion asina fuerte contra gobierno y hasta ta menciona momento di actuacion bergonsoso na nomber di gobierno den corte.
Mescos den e caso reciente na Malmok henter e problema ta cuminsa cu gobierno actual no a gusta cu gobierno anterior a introduci e ley aki cu ta un instrumento pa hiba un maneho ordena den uzo di tereno. Nan al contrario ta mire mas bien como un estorbo pa haci y deshaci den emision di tereno, propiedad di Pais Aruba, na nan antoho. Ta p’esey tambe, despues di entrada di gobierno actual na 2009, no a continua cu e implementacion di e ley, inclusivo e conseho di supervision cu e ley ta prescribi, cu no a continua mas desde cu e gobierno aki a haci su entrada.
Problema cu ta keda ta cu no ta parce di tin un fin na e violacionnan di ley di e ministro concerni y e pregunta cu ta surgi ta unda esnan ta keda cu mester cumpli cu nan tarea di controla e ministro. Apesar di nan pleito cu otro, mester tabata posibel pa e dos fanaticonan di MMA cu ta forma presidencia di e organo mas desprestigia di Aruba yega na un acuerdo ki dia e interpelacion di e ministro por tuma luga. Mas esey tarda, mas ta fortifica e pensamento den pueblo cu parlamento su existencia a keda bon formula den e famoso cantica:”tanto bal bo t’ey o lag’i t’ey.’ Y como consecuencia, e impunidad di e ministro atentando contra estado di derecho, ta continua.
