Abogado Eugene Martis ta informa cu den caso di Tiara Air hues a ‘ratifica’ e proposicion di pago manera cu Tiara a propone 20 november na e 151 creditor. Hues a haci esaki diabierna pasa despues di evalua e plan pa salba e aerolinea. E compania tin un debe di 18 miyon florin. Martis ta e persona apunta pa corte pa guia e caso aki di suspencion di pago, esta ‘bewindvoerder’.
Na november Tiara a presenta e plan pero hues ainda mester a evalua si esaki realmente ta factibel. Un di e puntonan importante ta e areglo pa cumpli cu e debe di 1 miyon florin na salarionan atrasa. Tin un grupo grandi di ex empleado pero tambe di personal tuma den servicio recientemente cu ainda ta warda riba nan placa. Tiara a priminti di cuminsa paga momento cu ta haya placa for di Venezuela (cu ta pega eynan). Den e caso cu lo no ricibi e placa por ultimo 1 di april 2016, lo cuminsa paga e trahadonan entrante 30 di april for di nan mesun fondo, asina e director Alejandro Muyale a bisa biaha pasa.
