(CNN) — Un hues a aproba un mocion pa retrasa e fecha di huicio den e caso contra Joran van der Sloot, un ciudadano Hulandes acusa den e supuesto extorsion di e mama di Natalee Holloway, un adolescente Mericano cu a desaparece durante un trip di graduacion na Aruba na 2005.

Abogado di Van der Sloot, defensor publico Kevin Butler, a entrega e mocion sin oposicion ayera pidiendo pa un retraso pa permiti “e tempo rasonablemente necesario pa un preparacion efectivo pa huicio,” segun documentonan di corte.

Hues Gray Borden a aproba e solicitud di extension pa no pasa di dia 2 di october. Ta spera cu ta bay pone un fecha pa e huicio despues.

Van der Sloot, un di e ultimo hende cu a mira Holloway di 18 aña prome cu el a disparce, a keda acusa na 2010 pa cargo federal di extorsion y fraude en conexion cu un intento pa bende informacion di e paradero di restonan di Holloway a cambio di $250mil, segun un documento entrega den districto nort di Alabama.

El a transferi e luna aki na Merca for di prison na Peru, unda e tabata cumpliendo un sentencia di 28 aña di prison pa asesinato den un caso separa.

Dia 9 di juni ultimo el a declara no-culpable den e caso di extorsion den corte federal Mericano. Ta spera cu e ta bay keda den custodia na Shelby County Jail na Alabama, como 35 miya for di Birmingham, te cu su huicio.

 

E fecha pa mocionnan prome cu huicio y pa informa e hues si Van der Sloot tin intencion pa declara culpabilidad of bay huicio inicialmente tabata poni pa dia 17 di juli. Den su solicitud pa un retraso, Butler a pidi e hues pa un continuacion di 30 dia di tur fecha limite pa pre-huicio y un continuacion di al menos 60 dia pa prepara pa huicio, segun documentonan den corte.

Segun e acusacion, mama di Holloway, Beth Holloway a transferi $15mil na un cuenta di banco cu Van der Sloot tabatin na Hulanda y a traves di un abogado a dun’e otro diesmil personalmente. Unabes cu e tabatin e prome $25mil, Van der Sloot a mustra e abogado John Q. Kelly unda supuestamente a sconde e restonan di Natalee Holloway, pero despues a admiti via e-mail cu e informacion tabata “inutil”, segun e acusacion ta declara.

Natalee a ser mira pa ultimo biaha 18 aña pasa cu Van der Sloot y otro dos homber bandonando un club nocturno na Aruba. Polis na Aruba a aresta y libera Van der Sloot y rumannan Deepak y Satish Kalpoe varios biaha na 2005 y 2007 en conexion cu desaparicion di Holloway. Abogadonan pa e hombernan a insisti di nan inocencia durante e investigacion.

Na december 2007, OM na Aruba a bisa cu no lo acusa formalmente ningun di nan tres y a stop e caso contra nan citando falta di evidencia.

Cinco aña despues, un hues na Alabama a firma un orden declarando Natalee legalmente morto.

Luna pasa, Peru a bay di acuerdo pa transferi Van der Sloot temporalmente pa enfrenta cargonan na Merca, despues di esaki, e lo bolbe Peru pa cumpli su sentencia den asesinato di Stephany Flores di 21 aña di edad.