(AP) – Un hues na New York a aproba e entrega di e productor di pelicula hopi conoci Harvey Weinstein na e estado di California, unda cu e ta enfrenta cargonan adicional di abuso sexual.

E aprobacion aki ta marca e final na un conflicto legal cu a ser prolonga varios biaha pa motibo di e pandemia di COVID-19, preocupacion di parti di e defensa pa cu Weinstein su salud y desacuerdo tocante algun documentonan.

Hues Kenneth Case a bisa cu no tin algun motibo pa retrasa e entrega y transferencia di Weinstein mas, nengando e abogado su peticion pa mantene Weinstein den e prizon den e area di Buffalo, unda cu e ta sirbiendo un sentencia di 23 aña pa motibo cu el a ser haya culpabel den e caso di violacion di aña pasa, te ora cu e seleccion di hurado ser selecciona pa e caso den Los Angeles, California.

E autoridadnan di Los Angeles tin den plan pa colecta Weinstein, ken tin 69 aña di edad, di Wende Correctional Facility den Alden, New York na final di juni of comienso di juli, e demandantenan a bisa durante e conferencia pa tuma un decision tocante e entrega di Weinsten den Buffalo, dunando e abogado di Weinstein tempo pa por apela e decision di e hues.

Weinstein su abogado, Norman Effman, a argumenta cu Weinstein mester permanece den e sector cual tin aspectonan di hospital na e prizon di maximo siguridad na Wende pa motibo cu e ta ricibiendo tratamento pa maladies y perdida di su bista, na luga di ser transporta te na warda di polis cu ta na otro banda di e pais na Los Angeles. Su sugestion di acusa Weinstein pa medio di video tambe a ser nenga.

“Nos no ta purbando di evita un huicio, nos ta purbando di evita un estadia innecesario na warda di polis na luga di laga Weinstein den prizon.” Effman a declara, bisando cu e detencion di Weinstein den un warda di polis lo stroba Weinstein di ricibi e cuido medico cu e tin mester.

Assistent di Erie County su abogado di districto Colleen Curtin Gable a argumenta den favor di Weinstein su entrega, bisando cu “e ta Los Angeles. No un luga straño y desconoci cu no tin cuido medico pa ofrece.”

Weinstein ta enfrentando 11 cargo di abuso sexual den California, cual ta involucra 5 hende muhe cu tin evidencia di e abuso y asalto sexual den Los Angeles y Beverly Hills desde 2004 te cu 2013. E cargonan ta inclui violacion, sexo oral forsa, asalto sexual pa medio di penetracion y restriccion cu uso di forsa.

Weinstein ta apela contra e veredicto cu el a abusa sexualmente di un actris den aña 2013 den camber di un hotel na Manhattan y a forsa un assistent di produccion di television y pelicula tin relacion sexual oral cu su persona den su apartamento na Manhattan den aña 2006.

Pa motibo cu Weinstein actualmente ta sera y sirbiendo su sentencia na New York, Case su aprobacion ta necesario pa por transferi custodia di Weinstein na autoridadnan di Los Angeles bao termino di un extradicion cu ta pasa di estado pa estado.

Un otro manera cu Weinstein su entrega por ser blokia ta pa medio di un obhecion di e gobernador di New York, pero Gable ta declara cu no tabatin ningun accion di e sorto di parti di e gobernador Andrew Cuomo.

Ademas di preocupacion tocante Weinstein su salud, Effman a cuestiona e validez di e documentonan unda cu ta pidi pa e extradicion di Weinstein traha pa autoridadnan di Los Angeles bisando cu e documentonan tin defecto pa motibo cu e no ta lista of nombra tur e cargonan, solamente algun di nan.

“Nos ta revisando e documentonan pa motibo cu nan no ta corecto. Nan a copia un formato y a solamente cambia e dia,” Effman a bisa Case.

Gable a declara cu e documentonan ta “absolutamente de acuerdo na tur e rekisitonan” di un acuerdo di extradicion.

Gable tambe a cuestiona Effman su declaracionnan tocante Weinstein su salud, bisando e hues cu siman pasa Weinstein a rechasa un tratamento receta na su persona pa su condicion di wowo bisando cu e “no tabata psicologicamente prepara” pa ricibi esaki, agregando cu oficialnan di polis a pasa door di hopi oftalmologo “buscando uno cu ta apropia y na gusto di e acusado.”

Segun Weinstein su abogado, su persona tin problemanan di salud yama myriad, y su condicion a empeora desde cu el a ser encarcela den prizon na Wende, incluyendo e hecho cu Weinstein a ser infecta cu COVID-19 dos siman despues di a cuminsa sirbi su sentencia den maart 2020.

Weinstein tin diabetes, enfermedad arterial, anemia, hypertensoin, dolor di lomba cronico, sciatica, arthritis cual ta limita su abilidad di por cana, dolor di pia cronico y enfermedadnan di wowo cual a dana su vision severamente, Weinstein su abogadonan a declara.

“Tur prisonero tin un derecho absoluto na ricibi atencion y cuido medico, cu tratamiento apropia mientras cu e persona ta den custodia” Gable ta bisa, “Pero nan no tin derecho di dicta unda y ki dia nan ta ricibi e tratamento, y no tin absolutamente nada den e reportahe di e dokter cu ta dicta cu Weinstein no por ricibi su tratamento den Los Angeles.”