Hues Sergio Moro ta haya falta di lidernan politico pa apoya lucha anticorupcion

E hues federal Brasileño Sergio Moro, encarga cu e caso Petrobras, a afirma den un entrevista divulga diamars pasa pa e canal di television Globo cu “falta lider politico” cu ta apoya e investigacionnan anticorupcion na Brasil.

“E mayor frustracion di henter e caso aki ta e hecho cu falta lider politico cu ta sobresali cu un discurso di apoyo pa e investigacionnan y especialmente cu un discurso reformista,” e magistrado a bisa.

Segun su opinion, lo importante ta di tin “lidernan” cu ta aumenta “e eficiencia di e sistema hudicial” di e pais, un campo den cual tin “un omision hopi grandi” y cu ta contrasta cu e conscientisacion fuerte contra corupcion den sociedad civil organisa.

Moro ta hues di e 13  Corte Penal Federal di e ciudad di Curitiba, unda ta concentra e investigacionnan den prome instancia di e caso di corupcion na Petrobras, cu a destapa tres aña y mey pasa e desvionan miyonario cu tabata opera den e compania petrolero estatal.

 Den e entrevista, divulga diamars anochi, Moro a defende su buskeda di restringi e proteccion privilegia di politico y a puntra su mes si realmente “e ta funciona manera un escudo” contra e responsabilidadnan di e personanan cu ta den e condicion ey.

“E paso ta di adopta un posicion reformista y puntra bo mes si e ta funciona. Nos lidernan lo mester adopta un posicion reformista encuanto e inmunidad politico,” el a subraya.

E magistrado a bisa cu e balansa di e asina yama Operacion Lava Jato ta hopi positivo, y el a reitera cu na Brasil tabata opera un red di corupcion “sistematico” cu a mantene su mes “pa añanan largo” y cu ta exigi un contesta di “basta”.

Moro a opina cu e operacionnan policial frecuente “ta bay conduci na un crecimento di e percepcion cu corupcion ta haci e pais atrasa” y el a avisa cu “un bon parti di e trabao ya ta haci caba” na Curitiba, loke no necesariamente ta traduci, ora e finalisa, den e fin definitivo di corupcion na e pais.

E scandal di e desvionan miyonario na Petrobras a hiba politico y empresarionan importante pa prison, ademas di toca cu presidente Michel Temer y algun di su ministronan, como tambe e ex-mandatarionan Dilma Rousseff y Luiz Inácio Lula da Silva.

Moro a evita responde riba e preguntanan encuanto e ex-gobernante Lula da Silva (2003-2010), ya cu e tin den su man ainda algun di e siete procesonan penal cu carismatico lider mester enfrenta, e mayoria relaciona cu e caso Petrobras.