(AFP) – Un hues Panameño diahuebs ultimo a ordena e detencion di ex-presidente Ricardo Martinelli, ken a pidi asilo y ta na embahada di Nicaragua for di dos siman pasa despues cu a perde su ultimo recurso pa evita un condena di 11 aña di prizon pa labamento di placa.

E magistrado Baloísa Marquínez “a ordena e detencion preventivo di ex-presidente di Republica den e proceso pa delito contra orden economico den e caso denomina New Business,” poder hudicial a bisa den un comunicado.

E hues Marquínez a argumenta cu ademas ta existi un “riesgo di huy evidencia den e comportacion di e persona sentencia aki,” ken dia 7 di februari a drenta embahada di Nicaragua na Panama, solicitando asilo politico, cu a ser concedi mesora pa gobierno di Daniel Ortega.

E presidente Nicaraguense Daniel Ortega tambe a duna asilo na otro ex-presidentenan cu ta enfrenta problemanan cu husticia, manera ex-mandatarionan iskierdista Salvadoreño Mauricio Funes (2009-2014) y Salvador Sánchez Cerén (2014-2019).

Alfredo Vallarino, un di e abogadonan di Martinelli, a enfatisa cu e orden di detencion “ta un medida cautelar (no definitivo) pasobra te ainda e proceso ta vigente pa varios recurso legal.”

E ex-gobernante derechista di 71 aña, ken a goberna Panama di 2009 te 2014 y tabatin intencion di bira candidato pa presidencia den eleccion di mei proximo, a ser condena na juli 2023 pa 128 luna di prizon y pa paga un multa di 19 miyon dollar pa labamento di placa.

E sentencia a ser confirma na october pa un tribunal di apelacion. E ex-mandatario y doño di un cadena di supermercadonan a presenta varios recurso despues, pero a perde esun ultimo na Corte Supremo dia 2 di februari ultimo.

Un dia despues el a lansa su campaña electoral, pero despues a drenta embahada Nicaraguense na Ciudad di Panama. Ortega a dun’e asilo indicando cu “e ta un persona cu ta persigui pa motibonan politico” y “su bida ta core peliger.”

Sinembargo, gobierno Panameño a nenga di dun’e un salvoconducto pa biaha Nicaragua. “Ora e ta cu asilo, e no a cumpli cu e medida preventivo cu tabata oblig’e di firma cada cierto tempo na husgado,” presidente di capitulo Panameño di NGO Transparencia Internacional, Lina Vega a comenta.

Martinelli a ser condena pa cumpra cu placa publico, na 2010, e mayoria di accionnan di Editor Panama America, e adkisicion a ser haci cu placa di sobornonan.

Pa e compra ey a usa parti di 43,9 miyon dollar cu varios compania a deposita, den un compleho di sociedadnan di pagonan di comision, hasta 10% di e monto di contractnan original di obranan publico, segun husticia.

E organo hudicial a bisa cu e orden di detencion anuncia diahuebs ultimo tambe a ser emiti pa motibo di un supuesto labamento di placa di sobornonan paga pa e compania constructor Brasileño Odebrecht, den esaki Martinelli ta acusa y ta den spera di e huicio cu lo ta na juli.