WILLEMSTAD – Diasabra ultimo hues Martinez a dicidi cu no tin niun necesidad pa gobierno laga un grupo Venezolano indocumenta den libertad. Segun e abogadonan di e grupo di Venezolanonan, ta cera den circunstancia inhumano y humilia.
Hues den su veredicto ta skirbi cu dia 26 di april ultimo el a bishita e departamento na unda e hendenan indocumenta ta keda. Pa motibo di reconstruccion algun hende indocumenta mester a keda temporalmente den celnan, pero nan no tabatin contacto cu e presonan. Segun hues e hendenan indocumenta tin un luga limpi, cuminda tres biaha pa dia, pasta di djente, habon, shampoo, productonan higienico pa damanan. Nan tin oportunidad pa bay gym, wak television, nan tin un luga pa papia cu famianan. Segun e abogadonan Shalten Hato y Molly Steward durante tratamento di e caso no tin niun motibo pa laga nan liber. Hato y Steward ta abogadonan di minister Quincy Girigorie. Hues Martinez tin e mesun opinion. ‘Por ta cu e hende indocumenta no ta gusta e luga, pero e situacion sigur no ta ni inhumano, e Venezolanonan no ta wordo humilia tampoco.’
Dia 23 di april ultimo Corte Europeo di Derecho Humano a dicidi cu e grupo por keda na Corsou. E tempo ey 33 hende indocumenta a entrega keho na Corte Europeo. Aworaki tin solamente shete persona cu ta den e baraknan. Tur e otronan a huy algun dia atras for di barak.
E grupo di shete awor por keda na Corsou den e barak. Nan tin cu keda den baraknan te minimal 23 di mei. E dia ey Corte Europeo lo tuma decision si nan lo sigui cu e caso of nan ta duna e caso bek.
E grupo di indocumenta a yega Corsou dia 11 di april cu un barco for di Venezuela. Nan a wordo aresta y a keda den custodia.
