Ayera merdia minister di Infrastructura, Medio Ambiente y Desaroyo Teritorial Marisol Lopez-Tromp, conhuntamente cu Marlon Croes di DOW, Anko Koopmans di Serlimar y abogado David Kock a invita medionan local pa un conferencia di prensa pa informa di un veredicto cu ayera mainta Corte di Husticia a duna tocante incinerator.

Abogado David Kock a splica cu algun medio di comunicacion a publica cu Corte a prohibi proyecto di incinerator na dump, algo cu no ta berdad segun e veredicto, Kock a sigura.

El a señala cu e demandante a exigi un lista largo di punto cu el a pidi pa condena pais Aruba den esakinan. El a pidi entre otro cu mester cera dump y esey Corte a rechasa. Pa loke ta trata e punto cu e incinerator no mester bin ey, hues no a prohibi esey en absoluto.

Loke si hues a bisa ta cu e incinerator ta den e lista di empresa cu ley di molester (hinderverordening) ta bisa cu mester tin un vergunning pa por opera. Pues no por opera un incinerator tanten cu no tin un hindervergunning.

Kock a bisa cu e punto cu nan no tabata totalmente di acuerdo cune ta cu Land Aruba a indica cu mester haci algun test cu e incinerator pa motibo cu pasobra Land ta cumprando e mashin aki di un empresa, e mester sa si e empresa a entrega e incinerator manera mester ta y si esaki ta cumpli cu regulacion.

Tocante esaki, hues a bisa cu tampoco tin cu sigui haci prueba cu e mashinmientras e hindervergunningno ta cla. Land Aruba no tin ningun problema cu esey, Kock a destaca. Tambe hues a bishita e instalacion di incinerator y a observa tambe loke ta sucediendo riba dump, y a yega na e decision cu Land Aruba no por opera e incinerator riba e dianan cu biento ta bolter, pues ora biento no ta supla di direccion normal di tera pa lama, sino di lama pa tera.

Mesun cos ta aplica pa candela na dump di cual hues a bisa cu mester percura pa no tin candela riba dump ora cu biento ta draai, esaki no por exigi pa prohibi Land Aruba di hacie, ya cu ta Land Arubames mester haci su best pa paga e candelanan ey.

Hues a indica tambe cu e sistema di procesa sushi, awor na Ser’i Teishi unda ta der’e, ta un adelanto hopi grandi di loke e sistema tabata prome. Aparte di esaki tambe tin un peticion di e demandante na unda tabata pidi pa paga e famia pa daño y perhuicio, y gasto di mudanza si mester muda di e lugar, hues a rechasa esaki.

Kock a expresa cu Land Aruba lo mester paga un boet si pone e incinerator opera sin hindervergunning of si lo opera ora biento bira, den conclusion Kock a menciona cu esaki no ta un proyecto cu a para sino cu ta den espera di e hindervergunning pa opera.

Marlon Croes director di DOW a declara cu e doño di incinerator ta Gobierno di Aruba (Land Aruba; red.) y el a splica cu den e caso aki, ora ta cumpra un ekipo tin cu haci algun prueba cu mester haci na e fabrica mes y ora cu yega na e pais unda ta instala esey, ta tuma lugar otro prueba, haci caba, pa wak si e mashin ta cumpli cu e requisitonan.

Un di e requisitonan ta cu mester handle e kimamento di sushi, como tambe tin cu cumpli cu e ‘pollution control system’ pa garantisa ora ta saca huma esey no ta perhudicial pa medio ambiente y vecindario. Tanten e pruebanan no tuma lugar no por traspasa e instalacion na Gobierno, nan lo tuma over na momento cu pasa e pruebanan exitosamente.

Tambe el a afirma cu durante tres dia nan a haci algun prueba, e di tres dia nan a dicidi di cancela e pruebanan cu mester dura 5 dia, pa motibo cu horcan Gonzalo tabata pasa panort di Aruba y nan a detene e operacion di biaha.

Croes tambe a comenta cu na inicio Serlimar tabata e compania encarga di e proyecto aki y pa motibonan conoci, segun el a sigura, como DOW nan a dicidi di tum’e over pa por opera, a base di esey nan a pidi e hindervergunning.

Minister di Infrastructura, Medio Ambiente y Desaroyo Teritorial Marisol Lopez-Tromp a expresa cu den ultimo seis luna cu el a haya e cartera aki, esaki tabata un di e puntonan cu a tuma hopi dedicacion y tempo di su ministerio, cu e meta di trece un alivio pa e molester.

“Hues a bisa cu Ser’i Teishi a conoce un adelanto grandi pa loke e tabata seis luna pasa,” el a enfatisa.Tambe a papia cu un di e areanan unda sigur tambe tabatin molester y holor no solamente pa e persona cu a trece e caso dilanti sino otronan den e bario cu tambe tabatin molester, esey a trece un adelanto grandi y siguramente lo sigui traha riba aspectonan di uso di incinerator.

Pa finalisa, el a indica cu condicionnan cu hues a pone ta aspectonan cu departamento lo usa como punto di salida y tambe e condicionnan y criterionan pa loke ta e uso di incinerator.