Ayera tardi den Corte di Prome Instancia a tuma luga tratamento di un caso contra dos agente policial cu riba dia 28 di september 2020 a tira un persona mata den un cas na Sero Pita.
Fiscal di Ministerio Publico, P. Van der Biezen a splica cu riba dia 28 di september 2020, e dos agente policial a ricibi un melding pa asisti na un cas na Sero Pita na unda cu despues di nan yegada, na dado momento e situacion a escala y a bay for di man resultando den fayecimento di un persona.
Segun Van der Biezen a sigui splica e suceso cu a tuma luga e dia en cuestion, na momento cu e agentenan policial a yega na e cas, e victima tabatin un boter di glas, a kibra esaki y a ataca e polisnan cu e boter di glas kibra. E polisnan cu a atende e melding a haya nan mes den un situacion na unda nan mester a defende nan mes y nan a tira e persona aki varios biaha, cu consecuencia cu e persona a fayece.
Pa loke ta e caso aki, Van der Biezen a indica, for di prome instante Ministerio Publico a seponeer a e caso. Ministerio Publico tuma decision, despues cu landsrecherche a realisa nan investigacion, pa seponeer e caso y no persigui e agentenan pasobra Ministerio Publico no ta wak cu un hecho castigabel a tuma luga.
Famia di a victima a haci uso di nan derecho y a entrega un keho na Hof, Corte Superior, a base di articulo 15 di Buki di Procedemento Penal. Corte Superior a dicidi, despues di a realisa nan propio investigacion, pa indica na Ministerio Publico cu – mirando e circunstancia di e caso aki, un persona a wordo tira y a fayece – Ministerio Publico ta obliga pa hiba e caso dilanti hues pa asina hues mes por tuma un decision si e hecho ta castigabel y/of e personanan ta castigabel si of no.
Familiarnan di e victima a publica un comunicado mediante Bon Dia Aruba dia 2 di october 2020, indicando con e suceso a tuma luga y e diferente inconsistencia cu tabata existi den e caso aki, na unda “un persona a muri door di 5 tiro y tur esaki a sucede den presencia di su casa y su yiunan cu tambe por a wordo alcansa.”
“Ora Peña a wordo tira el a cay abao. Eynan ta momento cu su yiu homber a grita e polis: Kico bo ta haci, dicon bo ta tir’e? E yiu homber a mishi cu schouder di e polis p’e stop di tira” y eynan e polis a punta e pistol riba e yiu homber tambe den direccion di su bariga. E polis tabata tembla y tabata hopi spanta, sin sa kico pa haci, e yiunan a cuminsa grita pa yama ambulance.”
Den e comunicado tambe e famia a bisa: “kico ta ser haci pa un departamento asina importante di isla Aruba y unda e pueblo ta depende completamente di un cuerpo policial pa para banda di e pueblo pa defende, cuida y proteha tur den cualkier situacion. Ora un caso di e manera aki asina ta presenta, na ki momento nan por usa nan arma di candela si e otro persona no tin igual?”
“Nos tin un maneho y/of structura cu ta bisa stap 1, despues stap 2 y si no logra stap 3 y tira? Nos famia ta desea un splicacion y un aclaracion riba e uso desproporcional di arma di candela, manera nan ta bisa, pa nan defensa propio of ora nan sinti nan mes ‘menasa’ pa nos tata. Ki dia nos lo haya husticia?”
Durante e tratamento di e caso, fiscal Van der Biezen a remarca, tanto Ministerio Publico como defensa di acusadonan a trece dilanti na hues cu e hecho ta castigabel, esey por wordo proba, e polisnan a tira e persona mata, pero tin un hustificacion pa esey. E hustificacion ta trece cune cu e hecho no ta castigabel y e polisnan tin cu wordo libera di tur persecucion.
“Hues a tuma su momento pa bay pensa e caso un rato, despues di algun minuut el a regresa y a bisa cu e ta libera e personanan aki di tur persecucion penal. Esaki kiermen cu e ta casi mescos cu un vrijspraak, pero nan no ta igual y e consecuencia ta cu nan no ta wordo castiga y nan ta ser libera di tur persecucion,” Van der Biezen a bisa.
E fiscal a splica tambe cu otro consecuencia di esaki ta cu, mirando cu tanto Ministerio Publico como tambe defensa ta di opinion cu e hecho no ta castigabel, tur dos partido a retira y esaki ta nifica cu no tin posibilidad pa apela.
Abogado Vito Carlo, un di e abogadonan cu a representa e agentenan policial, a indica cu e resultado final, cu e agentenan policial como sospechoso no ta castigabel, ta e resultado cu nan tabata kier. Pero e manera con e hues a yega na e decision, Carlo no ta full di acuerdo cune. “Ami ta sinta pa e polis y ami ta haya nan a actua conforme nan tarea. Eigenlijk ami ta haya cu loke nan a haci no ta un hecho castigabel,” el a bisa.
Otro punto Carlo a menciona cu e hues a trece pa dilanti tabata kibramento di un porta. El a splica cu na momento cu e victima tabata deteni caba, bao influencia, el libera su mes di e detencion, pero el a agrega cu segun nan for di e folder tabata sali bon cla cu e doño di e cas a duna e polisnan permiso pa kibra e porta pa nan por a drenta.
“Na final di dia ta mesun resultado, ta djis con bo ta cualifik’e ami lo kier a wak e otro, pero e resultado ta mescos,” el a finalisa.
