Hues a dicta den un caso di un ambtenaar hopi cla cu un minister no por sinta riba e stoel di gobernador pa cu promocion di un trahado publico.
E veredicto di 9 di october ta di un caso di un ambtenaar cu a bringa un decision cu minister di Salud Publico a tuma riba e peticion pa promocion. E mandatario concerni a nenga e promocion. Sinembargo esaki e no por haci legalmente, hues ta bisa. E minister a informa e ambtenaar den un carta di 9 di februari 2016 cu e lo nenga e peticio di e ambtenaar pa wordo promovi pa rango di hoofdcommies schaal 10 entrante 1 di october 2009 (pues cu un retraso di 7 aña) y entrante di 1 di october 2011 pa wordo promovi pa rango hoofdcommissie eerste klasse schaal 11. E ambtenaar e ora a protesta y asina yega te na corte. 10 di october aña pasa e ambtenaar a defende su caso y asina tabatin varios sesion.
Finalmente hues por a yega na un decision, uzando e ley LMA di e derechonan di ambtenaar cual ta papia di e ‘bevoegd gezag’ esta e gobernador. Y tambe referiendo na otro veredictonan cual ta indica cu solamente gobernador por trata peticion di promocion. Pues asina gobernador so ta autorisa tambe pa nenga peticion, segun hues den e caso aki.
Asina e peticion di su promocion mester bay gobernador pa tuma un decision legal. Den e caso cu e gobernador lo no tuma un decision den un periodo di 3 luna for di e veredicto aki, hues ta bisa cu por conclui cu, a nenga e peticion di e ambtenaar. Asina e ambtenaar por bay corte atrobe pa protesta.
