Un di e huesnan local nobo na Corte Comun di Husticia, trahando na Curaçao actualmente, ta di Aruba. Mr. Angèle (Angeline) Martijn a nace na Aruba y a termina VWO na Colegio Arubano na 1991. Despues un carera varia a hib’e te na bira hues. Un entrevista cu a aparece den e relato di 2019 di Corte Comun di e islanan.

Angèle Martijn den su añanan na scol na Aruba tabata traha caba den varios hotel durante vakantie. Esey el a haya placentero y tabata motibo pa despues bay haci un estudio HBO di ‘Facility Management’ na Hulanda. Despues di a termina su estudio na 1999, Angèle a bolbe na Aruba, unda el a traha te 2003 como funcionario di marketing, research & planning na Directie Posterijen. “Mi a pasa den diferente funcion a traves di aña unda mi a descubri cu mi ta un persona cu cada tanto tempo mester di un cambio y desafio nobo. Mi gusta dinamica y diversidad,” segun Angèle.

Despues di caba su estudio HBO, Angèle a haya e sentimento cu tabata falta algo. Tambe despues di a traha dos aña na Directie Posterijen e sentimento ey no a kita. Kico mas e por haci? Cu un debe halto di su estudio tabata dificil pa bolbe Hulanda pa un di dos estudio. “E decano di Universidad di Aruba a recomenda mi – despues di un conversacion hopi agradable – pa bay studia ley. Mi tabatin duda grandi si estudio di ley lo tabata algo pa mi. Sin embargo mi a hacie toch. E promer semester a bay asina bon, cu mi tabata sa sigur e momento ey cu mi kier a continua mi carera como hurista.”

Angèle a termina su estudio na 2003 cu exito, despues di cual el a pasa mesora pa abogacia. Di 2003 te cu 2010 el a traha como abogado cerca bufete Sjiem Fat & Co y VanEps Kunneman VanDoorne. Despues el a scoge pa otro rumbo: traha riba maneho. El a traha na dos ministerio, Asunto General y Salubridad Publico, di 2010 te 2015, como asesor huridico.

Cla pa bay ‘rio-opleiding’

Anto e momento ey tabata tempo pa un otro desafio. Na 2015 Angèle a reacciona riba e vacatura di ‘rechter in opleiding’, conoci como ‘rio’. “Tempo cu mi tabata terminando mi estudio di ley, mi tabata sinti atraccion pa e evaluacion independiente, imparcial y obhetivo di disputa. Pero mi tabatin e sensacion cu mi no tabata cla ainda pa e posicion di hues. Mi interes pa hurisdiccion no a bira menos despues. Na 2015 un amiga a mustra mi riba e vacatura di rio y mi a bay solicita di biaha. Mi tabata cla p’e.”

Den su funcion di asesor huridico na dos ministerio, Angèle tabata traha estrechamente cu politico. “Mi a anticipa di haya un cantidad di pregunta critico durante e entrevistanan di mi solicitud y asina e tabata tambe.” Pero esaki finalmente no a resulta un obstaculo pa por drenta e opleiding. Durante esaki a pone Angèle su perseverancia na prueba. “E perseverancia ey mi ta hiba cu mi pa futuro. E preparacion pa bira hues ta largo y pisa. Ta mi deseo pa mi pasa e perseverancia ey pa mi yiu homber.” E estudio pa bira hues ta largo y pisa. E ta exigi hopi di e famia di un candidato di rio. Pa Angèle tampoco e tabata facil. “Como mama soltero cu un yiu di 6 aña na Curaçao, unda mi no tin famia, esey tabata hopi pisa. Pero tempo cu mi a yega aki felizmente mi a haya hopi apoyo di mi colega y ‘roommate’ di rio di e tempo ey, Faye Wannyn, y despues tambe di otro colega y amigonan pafor di Corte. Tabata un tempo pisa, educativo, pero mas cu tur cos un periodo bunita.”

Scucha bo ‘inner voice’

Ta visto cu Angèle no tin miedo di haci cierto escogencia cu ta hib’e den un otro rumbo. Kico lo e conseha un studiante hoben cu mester haci un escogencia ainda pa futuro? “Si bo a puntra mi durante cu mi tabata na e hotelnan na Aruba, si mi tabata mira mi mes como hues den futuro, e contesta lo tabata ‘absolutamente cu no’. Mi conseho ta anto: scucha bo ‘inner voice’, sea semper consciente di tur e posibilidadnan cu tin y sea habri pa esey (pa straño cu e por mustra a primera vista), y bay p’e na momento cu bo ‘inner voice’ bisa bo cu bo ta cla p’e.”

(Traduccion: redaccion Bon Dia Aruba)