(AP) – Un hues na New Mexico tin plan di tuma decision diabierna riba un peticion pa retira e acusacion contra Alec Baldwin den e tiro fatal di un cinematografo a causa di preocupacion cu FBI a causa daño na e arma durante testnan forensico prome cu abogado di defensa por a examina esaki.
Abogado di defensa pa Alec Baldwin a pidi Hues Mary Marlowe Sommer pa retira e caso den contra di Baldwin prome cu loke ta considera e huicio di perfil halto cuminsando den juli.
Baldwin su ekipo legal a haci peticion cu, si e huicio sigui dilanti, e hues mester por lo menos prohibi e presentacion di un analisis di e arma usando partinan reemplasa pa un experto di arma pa fiscalia. Nan a bisa cu e investigadornan por a destrui evidencia cu posiblemente ta kita culpa for di Baldwin durante testnan unda cu e arma accidentalmente por los tiro sin cu haci esaki manualmente.
Durante training pa grabacion, Baldwin a dirigi e arma na Halyna hutchins ora cu esaki a los un tiro, causando su fayecimento y heridando e director Joel Souza, ken a sobrevivi.
Baldwin a declara su mes inocente na acusacion di asesinato inboluntario, cual ta carga un sentencia maximo di 18 luna den prizon.
E investigadornan inicialmente a manda e revolver na FBI pa testnan di rutina, sinembargo ora cu analista di FBI a tende Baldwin bisa den entrevista di ABC TV cu nunca el a primi pa los tiro, e autoridadnan local a bisa cu nan por haci un test unda cu por mira si esaki a dispara accidentalmente aunke cu e test aki por causa daño na e arma.
FBI a ser bisa pa e ekipo di investigadornan pa dal bay y a test e revolver pa medio di golpia esaki den varios angulo. Un di e golpinan aki a fractura e arma su mecanismo di disparo y seguridad.
Baldwin su abogadonan ta bisa cu autoridadnan a haci un test destructivo di e arma sin desmantela esaki prome y tuma potret di e partinan, efectivamente eliminando nan evidencia mas critico den e caso. Notando e daño na e revolver, nan a urgi hues pa prohibi hurado di mira un analisis di e arma reconstrui.
