Ayera den Corte den Prome Instancia a tuma luga tratamento di e caso di ontneming cu Ministerio Publico (OM) a cuminsa contra e sospechoso, ex parlamentario y minister Benny Sevinger, den e investigacion Avestrus. OM a entrega un demanda di confiscacion pa un total di 900 mil florin den e caso.

Mediante un comunicado di prensa OM a informa cu nan a exigi e suma di 900 mil florin como compensacion pa e supuesto beneficionan financiero cu e sospechoso a ricibi di manera ilegal di e crimennan pa cual el a ser condena den apelacion di caso Avestruz tambe.

OM a splica cu e capital obteni di manera ilegal ta inclui entre otro, donacionnan cu a ser duna na su persona y tambe sumanan haya di manera inexplicabel.

Anteriormente e ex parlamentario y minister a ser condena pa un castigo di prison di 48 luna, di cual 12 luna ta condicional cu un tempo di prueba di 3 aña. Ademas a kita e derecho di participa den eleccionnan y e derecho pa ocupa cualkier cargo publico durante un periodo di 5 aña.

“Caso Avestrus ta encera acusacionnan grave contra e ex-minister di Infrastructura y tabatin un impacto profundo den sociedad. Cu e ontneming, Ministerio Publico ta busca pa kita e beneficionan financiero obteni aki, cu e fin di manda un señal cla cu crimen no ta paga,” OM a indica.

Dia 3 di april hues lo dicta su sentencia den e caso di ontneming aki.

Segun e noticiero local Noticia Cla durante tratamento di e caso Sevinger a indica cu e no por acepta cu el a ricibi 900 mil florin ilegalmente, manera cu OM ta bisa. Ademas, hues a puntra e sospechoso tocante su situacion actual caminda cu Sevinger lo a bira emocional y a cuminsa yora indicando cu e ta desemplea y cu su situacion ta hopi dificil na e momentonan aki. “Mi ta traha cashi, aki aya, ta haci trabou di verf. Loke mester pa sobrevivi,” Sevinger a expresa.

E portal a reporta cu na e momento aki e yiu muhe di Sevinger, actual parlamentario Stephany Sevinger, tambe tabata den corte y tambe a biba un momento hopi emocional y no por a contene su lagrimanan.

Segun e noticiero, durante e tratamento a sali na cla cu durante e tempo cu Sevinger tabata minister y tabata biaha, e tabata spaar su ‘daggeld vergoeding’ y tabata usa esaki pa paga trabou riba su cas y e resto e tabata warda pa su siguiente biahe.

Na salida for di corte Sevinger, ken tabata compaña pa su famia, incluyendo su yiu muhe Stephany Sevinger ken ta actualmente parlamentario pa fraccion AVP, a duna declaracion na Telearuba y a splica cu manera ta conoci e caso Avestruz ta andando y di caso aki OM ta indica cu tin regalonan, sumanan financiero cu el a ricibi cual nan ta pone un suma na dje. Di esaki nan a cuminsa e caso di ontneming contra dje cu e meta pa kita e suma indica for di dje.

El a indica cu OM ta bay mas leu cu esey den e caso di un ontneming aki pasobra nan ta bay cu cosnan cu no ta ni den e caso. Manera ya caba menciona OM a yega na e suma di 900 mil florin y Sevinger a señala cu OM ta djis simplemente :scoge loke nan ta kere cu nan por bisa cu nan ta haya cu ta ilegal haya.” Pero el a remarca cu OM no por prueba di unda e placa aki a bin supuestamente.

Sevinger a indica cu investigacion di OM, cu ta bisa cu e tin tres cas na Miami, condominium na Aruba, cuenta di banco na Corsou, Panama y Merca caminda e placa ilegal ta bay, no ta corecto.

“Ni den e caso pa loke ta trata e strafzaak esey no por a ser proba, nan no a ni trece dilanti, pero esey nan a usa si pa nan haci investigacion, nan a us’e pa tene mi 70 y pico dia cera y ta usa esey tambe awo den e ontnemingzaak,” el a bisa.

El a splica cu loke OM a haci ta cu nan a haci un taxatie di su cas y e taxatie rapport aki ta bisa cu su cas ta costa na e momento aki 1.5 miyon. El a sigui splica cu OM ta bisa e 900 mil lo a bin di un fuente, cu segun Sevinger nan no por bisa ken, cu a dune e placa ey y cu e ta placa ilegal.

“Ami a prueba nan cu mi tin un hypoteek, 600 mil florin. Mi a haya na salario como parlamentario y minister 3.5 miyon florin. Mi a haya na entradanan di otro fuente, manera cu mi casa ta traha, los di entradanan oficial. Mi tin suficiente placa pa tin un cas, despues di 30 aña, cu tin un balor di 1.5 miyon florin. Esey ta e balor, e no ta e loke a costa pasobra ami mes a traha mi cas,” e ex parlamentario y minister a sigura.

El a remarca cu e caso aki no ta bay tocante e acusacionnan cu nan tin den su contra, cu el a haya placa ilegal, pero cu e ta bay over di un persecucion politico den su contra.

Caso Avestruz a cuminsa cu un investigacion di Landsrecherche tocante delitonan di corupcion cu posiblemente tuma lugar relaciona cu entrega di tereno di gobierno entre 2009 y 2017.

Den caso Avestruz a investiga e posibel rol di ex-minister Benny Sevinger y tabata dirigi riba e pregunta si companianan a haya derecho di erfpacht a base incorecto.

Oficialmente e caso a cuminsa na luna di september di 2022, pa varios dia e diferente sospechoso a acudi na corte pa interogacion tocante e fundacion Curason Berde. Un di e tres acusadonan a nenga di contesta e preguntanan di hues na comienso di e caso, ya cu segun el a indica, el a wordo interoga varios biaha como testigo y el a contesta casi 3,000 pregunta. P’esey el a sigura cu no tabatin necesidad pa contesta ningun di e preguntanan, lagando esey na su abogado.

Manera ya ta conoci Sevinger a ser condena pa su participacion den e caso. Inicialmente Corte di Prome Instancia di Aruba a haya Sevinger culpabel di abuso di poder y di su funcion como minister y dun’e un castigo di un aña di prison cu seis luna condicional y tambe a inhabilit’e pa eherce un funcion publico pa un periodo di cinco aña. Sevinger y su ekipo no a keda contento cu e sentencia aki y a dicidi di apela.

Den luna di juli aña pasa Corte di Apelacion a duna su sentencia y den esaki a aumenta e castigo di Sevinger. Corte di Apelacion a aumenta e castigo di Sevinger cu 36 luna, pa un total di 48 luna di castigo di prizon, di cual tres aña ta condicional, y a kita tambe e posibilidad di ser eligi of di traha como ambtenaar pa cinco aña.

Despues di e sentencia aki Sevinger a keda decepciona un biaha mas y a expresa cu OM ta esun cu ta corupto y cu tin un persecucion politico su tras. Sevinger a apela e decision y a opta pa bay Casacion. Ainda no tin sentencia pa loke ta caso Avestruz den Corte di Casacion, pero OM a indica cu Casacion no lo considera e hechonan di e caso di nobo, pero si lo considera e proceduranan legal y si e decision di Hof ta bon motiva.