Hues lo dicta sentencia den caso di Señor Frog’s diabierna awo

Representante di Señor Frog’s Daniel Orosco tabata den corte ayera pa un caso contra gobierno cu a prohibi sr. Orosco di biaha. Manera conoci Señor Frog’s a cera su porta lagando e 32 trahado sin pago. 

 

E prohibicion di biaha ta bin for di departamento di Belasting y sr. Orosco awor ta purba di convence hues pa kita e prohibicion aki. Como cu su abogado Joslyn Croes ta defende cu su cliente ta simplemente un trahado di e compania di afo cu a bin cumpli cu su parti. 

 

Segun abogado Bryan Koffie representando gobierno esaki no ta e caso. E prohibicion pa e sali tin di haber cu  cierto debenan fiscal di e compania Jobem cu ta e doño di trabou di diferente empleadonan di Señor Frog’s.

 

E empleadonan a presenta, aunke nan no ta un partido den e caso aki, pa asina scucha e ponencianan den e caso aki. Tin indicacion cu lo por tin un ripiticion di un negoshi cu lo wordo cera lagando diferente empleado riba caya sin pago. Segun abogado Koffie sr Orosco tin e rol principal pa cera e porta di Señor Frog’s.

 

Sra. Starr Ramos ta representa e trahadonan y e tambe ta confirma cu Daniel Orosco ta e persona cu a tuma decision pa cera e luga, bisa pa entrega yabi y tuma e placa. E dia despues el a informa tur empleado cu Señor Frog’s no ta existi mas. Sra. Ramos ta expresa cu e unico garantia cu nan tin di wordo paga ta ora sr. Orosco ta keda na Aruba. Ya cu na cuminsamento e tabata cla pa bula bandona Aruba sin splicacion y sin pago. 

 

Hues a indica  cu lo wordo tuma un decision diabierna awo.